નવી દિલ્હી, 02 સપ્ટેમ્બર (હિ.સ.). ભારતીય જનતા પાર્ટી (ભાજપ) શાસિત રાજ્યોના મંત્રીઓ માટે 3 સપ્ટેમ્બરના રોજ પાર્ટી મુખ્યાલયમાં પ્રશિક્ષણ શિબિરનું આયોજન કરવામાં આવશે. શિબિરમાં દેશના ભાજપ શાસિત રાજ્યોના લગભગ 25 મંત્રીઓ સામેલ થવાની સંભાવના છે. ભાજપના રાષ્ટ્રીય અધ્યક્ષ નિતિન નવીન, સંગઠન મહામંત્રી બીએલ સંતોષ અને વિનય સહસ્ત્રબુદ્ધે મંત્રીઓને પ્રશિક્ષણ આપશે.

સૂત્રો અનુસાર, શિબિરમાં કેન્દ્રીય યોજનાઓ અને નીતિઓને જનતા સુધી અસરકારક રીતે પહોંચાડવા પર વિશેષ ધ્યાન કેન્દ્રિત કરવામાં આવશે. આ સાથે જ યુવાનો સાથે સંવાદ વધારવાના ઉપાયો પણ મંત્રીઓને જણાવવામાં આવશે. મંત્રીઓને સરકારની ઉપલબ્ધિઓ અને જનકલ્યાણકારી યોજનાઓને જમીની સ્તર સુધી અસરકારક રીતે પહોંચાડવા અંગે પણ માહિતી આપવામાં આવશે. આ સાથે જ જળ વ્યવસ્થાપન, ભૂગર્ભ જળ સંરક્ષણ, સિંચાઈ અંગે પણ ચર્ચા થશે.

પ્રશિક્ષણ શિબિર પછી તમામ લગભગ 25 મંત્રીઓ વડાપ્રધાન નરેન્દ્ર મોદી સાથે મુલાકાત પણ કરી શકે છે. ઉલ્લેખનીય છે કે, રાજધાનીમાં કેન્દ્ર અને રાજ્યો વચ્ચે સંકલનને મજબૂત બનાવવા તથા 'જલ સુરક્ષિત ભારત' અને 'વિકસિત ભારત 2047'ના લક્ષ્યને આગળ વધારવાના ઉદ્દેશ્યથી જલ શક્તિ મંત્રાલયનું પ્રથમ વિભાગીય શિખર સંમેલન 1 અને 2 સપ્ટેમ્બરના રોજ સુષમા સ્વરાજ ભવનમાં આયોજિત કરવામાં આવ્યું. બે દિવસીય આ સંમેલનમાં રાજ્યોના મુખ્યમંત્રીઓ અને મંત્રીઓ પણ ભાગ લઈ રહ્યા છે.

હિન્દુસ્થાન સમાચાર / વિજયાલક્ષ્મી / મુકુંદ

હિન્દુસ્થાન સમાચાર / માધવી વ્યાસ