ઢાકા, નવી દિલ્હી, 21 સપ્ટેમ્બર (હિ.સ.). બાંગ્લાદેશની રાજધાની ઢાકાના ઉપનગરીય વિસ્તાર અશુલિયાના જમગોરા ઇન્ડસ્ટ્રિયલ વિસ્તારમાં રવિવારે સાંજે કવર્ડ વાનમાં એલપીજી સિલિન્ડર ફાટવાથી છ લોકોના મોત થયા અને ઓછામાં ઓછા 20 લોકો ઘાયલ થયા. ધડાકા એટલા જોરદાર હતા કે એક સિલિન્ડર લગભગ 200 ગજ દૂર જઈને પડ્યું, જેના કારણે રસ્તા કિનારે એક દુકાનની અંદર હાજર મહિલાનું મોત થયું. આ ધડાકાઓને કારણે એક ગારમેન્ટ ફેક્ટરી આગની લપેટમાં આવી ગઈ.

ઢાકા ટ્રિબ્યુનના અહેવાલ મુજબ, ધડાકાઓને કારણે લાગેલી આગે સાંજે લગભગ 6:45 વાગ્યે જમગોરામાં હાજર પાંચ-છ વાહનોને પોતાની ઝપેટમાં લીધા. અશુલિયા પોલીસે રવિવારે મોડી રાત્રે જણાવ્યું કે આગ બુઝાવ્યા બાદ આસપાસ શોધખોળ કરવામાં આવી. આ દરમિયાન રાત્રે લગભગ સવા 11 વાગ્યે કવર્ડ વાનની અંદર પાંચ લોકોના મૃતદેહ મળ્યા. તેમની ઓળખ તરત થઈ શકી નહીં. એક મૃતકની ઓળખ 55 વર્ષીય ઝૈનબ તરીકે થઈ. તેઓ ગાઝીપુરના કાશિમ્પુર નિવાસી મોહમ્મદ અલીના પત્ની હતા. ઝૈનબ પોતાની દીકરી સંજીદા અખ્તરને મળવા આવ્યા હતા. સંજીદા ઘટનાસ્થળથી લગભગ 200 ગજ દૂર એક ટેલરની દુકાનમાં કામ કરે છે.

તેઓ દુકાનની અંદર ઊભા હતા, ત્યારે એક સિલિન્ડર ટીનની છત ફાડીને તેમના માથા પર વાગ્યું, જેના કારણે તેમનું ઘટનાસ્થળે જ મોત થયું. ઘટનાસ્થળે હાજર અધિકારીઓ અનુસાર, આ ઘટના જમગોરામાં પ્રીટી ગ્રુપ સાથે સંકળાયેલા એક ઇન્ડસ્ટ્રિયલ વિસ્તારમાં બની. ડીઇપીઝેડ ફાયર સર્વિસના વેરહાઉસ ઇન્સ્પેક્ટર સોમેન બરુઆએ જણાવ્યું કે, આગ ત્યારે લાગી જ્યારે ફેક્ટરીમાં ઉપયોગ માટે લાવવામાં આવેલા સિલિન્ડર એક કવર્ડ વાનમાંથી ઉતારવામાં આવી રહ્યા હતા.

અશુલિયા મહિલા અને બાળ હોસ્પિટલના પ્રબંધક હારુન-ઉર-રશીદે જણાવ્યું કે, 26 લોકોને હોસ્પિટલમાં લાવવામાં આવ્યા. તેમણે કહ્યું કે આમાંથી મોટાભાગના લોકો ફેક્ટરીની આસપાસના શાકભાજી વિક્રેતા અને રાહદારીઓ હતા. ગંભીર રીતે દાઝી ગયેલા બે લોકોને વધુ સારી સારવાર માટે ઢાકા મેડિકલ કોલેજ હોસ્પિટલમાં રિફર કરવામાં આવ્યા.

હિન્દુસ્થાન સમાચાર / મુકુંદ

હિન્દુસ્થાન સમાચાર / માધવી વ્યાસ