કચ્છ, 22 સપ્ટેમ્બર (હિ.સ.) :નખત્રાણા તાલુકામાં આરોગ્યલક્ષી સેવાઓને લોકો સુધી પહોંચાડવાના પ્રયાસરૂપે નખત્રાણા એસટી બસ સ્ટેશન ખાતે નેત્ર નિદાન કેમ્પનું આયોજન કરવામાં આવ્યું હતું. તાલુકા ભાજપના ઉપક્રમે અને કે.સી. આરસીના સહયોગથી યોજાયેલા આ કેમ્પમાં બસ સ્ટેશન પર આવનારા લોકો ઉપરાંત એસટી ડેપોના કર્મચારીઓએ પણ આંખોની તપાસ કરાવી હતી.

દૈનિક જીવનમાં આંખોની તકલીફને ઘણી વખત સામાન્ય ગણીને લોકો સારવાર પાછળ ઠેલતા હોય છે. આવા સંજોગોમાં આંખોની સમયસર તપાસ થાય અને પ્રાથમિક તબક્કે કોઈ સમસ્યા જણાય તો જરૂરી માર્ગદર્શન મળી રહે તે હેતુથી કેમ્પ યોજાયો હતો. કેમ્પ દરમિયાન નિષ્ણાતો દ્વારા ઉપસ્થિત લોકોની આંખોની ચકાસણી કરવામાં આવી હતી. સાથે જ આંખોની યોગ્ય કાળજી કેવી રીતે રાખવી, દ્રષ્ટિ સંબંધિત તકલીફ જણાય ત્યારે ક્યારે નિષ્ણાતની સલાહ લેવી તથા જરૂરી સારવાર અંગે માર્ગદર્શન આપવામાં આવ્યું હતું.

એસટી બસ સ્ટેશન પર યોજાયેલા આ કેમ્પનો લાભ ડેપોના કર્મચારીઓ તેમજ ત્યાં હાજર નાગરિકોએ લીધો હતો. જાહેર સ્થળે જ નેત્ર તપાસની સુવિધા ઉપલબ્ધ થતાં લોકોને પણ આરોગ્ય તપાસ માટે અલગથી સમય કાઢવાની જરૂરિયાત ઓછી થઈ હતી. કેમ્પમાં ઉપસ્થિત લોકોએ આંખોની તપાસ કરાવી આરોગ્ય અંગે જરૂરી માહિતી મેળવી હતી.

કાર્યક્રમ દરમિયાન નખત્રાણા એસટી ડેપો મેનેજર નરેશગીરી, તાલુકા ભાજપ પ્રમુખ ધર્મેશભાઈ કેસરાણી, તાલુકા ભાજપ મહામંત્રી હરિસિંહભાઈ રાઠોડ, નગરપાલિકા પ્રમુખ વસંતભાઈ, પૂર્વ સરપંચ ડાયાલાલભાઈ સંઘાણી, જીતુભાઈ જાડેજા, મયુરભાઈ વાઘેલા, નગરપાલિકા ડેમેજ સમિતિના ચેરમેન હિરેનભાઈ ભટ્ટ, મહિપતસિંહ સહિત એસટી ડેપોના કર્મચારીઓ અને અન્ય આગેવાનો ઉપસ્થિત રહ્યા હતા.

આ પ્રકારના આરોગ્યલક્ષી સેવાકીય આયોજનથી લોકોમાં આંખોની નિયમિત તપાસ અને દ્રષ્ટિની સંભાળ અંગે જાગૃતિ વધે તેવો આશય વ્યક્ત કરવામાં આવ્યો હતો. નખત્રાણા એસટી બસ સ્ટેશન ખાતે યોજાયેલા નેત્ર નિદાન કેમ્પને ઉપસ્થિત નાગરિકો અને એસટી સ્ટાફ તરફથી સારો પ્રતિસાદ મળ્યો હતો.

---------------

હિન્દુસ્થાન સમાચાર / Rohit Ramjibhai Padhiyar