આઈચી-નાગોયા (જાપાન), નવી દિલ્હી, 23 સપ્ટેમ્બર (હિ.સ.). ભારતીય મહિલા હોકી ટીમે એશિયન ગેમ્સમાં પોતાનું શાનદાર પ્રદર્શન ચાલુ રાખતા બુધવારે પૂલ બીની મેચમાં થાઈલેન્ડને 20-1 થી હરાવ્યું. ગિફુ પ્રીફેક્ચરલ ગ્રીન સ્ટેડિયમમાં મળેલી આ જીત સાથે ભારતે સતત ત્રીજી મેચમાં બે આંકડામાં ગોલ કર્યા. આ જીત સાથે ભારતીય ટીમ પૂલ બીના પોઈન્ટ ટેબલમાં ટોચ પર યથાવત છે. હવે ભારતનો મુકાબલો શુક્રવારે જાપાન સામે થશે.

ભારતે આ પહેલા ઉઝબેકિસ્તાનને 19-0 અને ઇન્ડોનેશિયાને 17-1 થી હરાવ્યું હતું. થાઈલેન્ડ સામે ભારત તરફથી દીપિકાએ નવ ગોલ કર્યા, જ્યારે નવનીત કૌરે ચાર અને રુતુજા પિસાળે ત્રણ ગોલ કર્યા. નેહા, લાલરેમસિયામી, સાક્ષી રાણા અને કેપ્ટન સલીમા ટેટેએ પણ એક-એક ગોલ કર્યો. દીપિકાએ પોતાના તમામ નવ ગોલ પેનલ્ટી કોર્નર દ્વારા કર્યા. તે એશિયન ગેમ્સમાં એક જ મેચમાં નવ ગોલ કરનારી પ્રથમ ભારતીય મહિલા હોકી ખેલાડી બની ગઈ. ત્રણ મેચમાં દીપિકા અત્યાર સુધી ભારત માટે 20 ગોલ કરી ચૂકી છે.

ભારતે મેચની શરૂઆતથી જ દબદબો જાળવી રાખ્યો અને થાઈલેન્ડની રક્ષણ પંક્તિ પર સતત દબાણ બનાવ્યું. ભારતીય ખેલાડીઓએ પેનલ્ટી કોર્નરનો પણ અસરકારક ઉપયોગ કર્યો અને મેચ પર સંપૂર્ણ નિયંત્રણ જાળવી રાખ્યું. થાઈલેન્ડને મેચના ચોથા ક્વાર્ટરમાં આખરે એક ગોલ મળ્યો. સુપાંસા સામાંસોના પેનલ્ટી કોર્નર પર લગાવેલા ડ્રેગ-ફ્લિકમાં નજીવો ડિફ્લેક્શન થયો અને બોલ ભારતીય ગોલમાં જતો રહ્યો.

ભારતે હાંગઝોઉમાં 2023ના એશિયન ગેમ્સમાં કાંસ્ય પદક જીત્યો હતો. ભારતીય મહિલા ટીમ હવે 1982 પછી એશિયન ગેમ્સમાં પોતાનો પ્રથમ સુવર્ણ પદક જીતવાના લક્ષ્ય સાથે આગળ વધી રહી છે. 1982માં દિલ્હીમાં યોજાયેલા એશિયન ગેમ્સના ઉદ્ઘાટન મહિલા હોકી ટુર્નામેન્ટમાં ભારતે સુવર્ણ પદક જીત્યો હતો.

હિન્દુસ્થાન સમાચાર / સુનીલ દુબે / સુનીત નિગમ

હિન્દુસ્થાન સમાચાર / ડો.હિતેશ એન.વ્યાસ