નવી દિલ્હી, 24 સપ્ટેમ્બર (હિ.સ.). ભારતીય રેલવેએ વડોદરા મંડળના અલકાપુરીમાં 166.5 કરોડ રૂપિયાના ખર્ચે ચાર લેનવાળા રોડ ઓવર બ્રિજ (આરઓબી)ના નિર્માણને મંજૂરી આપી છે. રેલવે અને રાજ્ય સરકાર આ પરિયોજનાનો ખર્ચ સરખે ભાગે વહેંચશે. નવો આરઓબી હાલના અલકાપુરી રોડ અંડર બ્રિજ (આરયુબી)ના સ્થાને વધારાનો અને બહેતર માર્ગ સંપર્ક પૂરો પાડશે.

રેલ મંત્રાલય અનુસાર, બંને પક્ષો આશરે 83.2769-83.2769 કરોડ રૂપિયાનો ખર્ચ ભોગવશે. આ આરઓબી વડોદરા રેલવે સ્ટેશનની આસપાસના માર્ગ ટ્રાફિકને સુગમ બનાવવાની સાથે અલકાપુરી અને કાળાઘોડા વિસ્તારો વચ્ચેના સંપર્કને મજબૂત કરશે.

હાલના આરયુબીની ઊંચાઈ આશરે ત્રણ મીટર હોવાને કારણે મોટા વાહનોની અવરજવર પ્રભાવિત થાય છે. ચોમાસા દરમિયાન અહીં પાણી ભરાવાની સમસ્યા પણ રહે છે, જેના કારણે ટ્રાફિક અવરોધાય છે.

રેલવે અનુસાર, વિસ્તારમાં વ્યસ્ત સમય દરમિયાન ટ્રાફિક પ્રતિ કલાક 1,600 થી વધુ પીસીયુ છે અને ઘણા સ્થળોએ ટ્રાફિક અથડામણના બિંદુઓ તથા રાહદારીઓ માટે અપૂરતી સુવિધાઓ છે. આવી સ્થિતિમાં, હાલનો આરયુબી વર્તમાન અને ભવિષ્યની ટ્રાફિક જરૂરિયાતો માટે પર્યાપ્ત રહ્યો નથી.

ચાર લેનવાળો ગ્રેડ સેપરેટેડ આરઓબી રેલવે સંચાલનને પ્રભાવિત કર્યા વિના બહેતર માર્ગ ક્રોસિંગ સુવિધા પૂરી પાડશે. આનાથી વડોદરા રેલવે સ્ટેશન, જીએસઆરટીસી બસ સ્ટેશન અને પ્રસ્તાવિત હાઈ-સ્પીડ રેલ સ્ટેશન સુધીનો સંપર્ક પણ બહેતર બનશે.

રેલવેએ જણાવ્યું કે, પરિયોજનાથી વડોદરા રેલવે સ્ટેશનની આસપાસનો માર્ગ સંપર્ક મજબૂત બનશે અને હાલના આરયુબીની ક્ષમતા તથા કાર્યાત્મક મર્યાદાઓ સંબંધિત સમસ્યાઓના નિરાકરણમાં મદદ મળશે.

હિન્દુસ્થાન સમાચાર / સુશીલ કુમાર / પવન કુમાર

હિન્દુસ્થાન સમાચાર / માધવી વ્યાસ