કચ્છ, 26 સપ્ટેમ્બર (હિ.સ.) : કચ્છ યુનિવર્સિટીના રસાયણશાસ્ત્ર વિભાગના વિદ્યાર્થી જોષી રોનક હિતેન્દ્રભાઈએ વર્ષ ૨૦૨૬માં એક પછી એક બે સરકારી ભરતી પરીક્ષાઓમાં સફળતા મેળવી પોતાની પ્રતિભા અને મહેનતનો પરચો આપ્યો છે. એક જ વર્ષ દરમિયાન બે અલગ-અલગ સરકારી ભરતીમાં મેરિટમાં સ્થાન મેળવી રોનક જોષીએ શૈક્ષણિક ક્ષેત્રની સાથે કચ્છ યુનિવર્સિટીનું પણ નામ રોશન કર્યું છે.

રસાયણશાસ્ત્ર વિષયમાં અભ્યાસ દરમિયાન તેમણે સ્પર્ધાત્મક પરીક્ષાની તૈયારીને પણ પ્રાધાન્ય આપ્યું હતું. નિયમિત અભ્યાસ, વિષયની મજબૂત સમજ અને સતત મહેનતના પરિણામે તેમને વર્ષ ૨૦૨૬માં બે મહત્વપૂર્ણ સરકારી ભરતી પરીક્ષાઓમાં સફળતા પ્રાપ્ત થઈ છે. તેમની આ સિદ્ધિ માત્ર વ્યક્તિગત સફળતા પૂરતી સીમિત ન રહેતા યુનિવર્સિટીના અન્ય વિદ્યાર્થીઓ માટે પણ પ્રેરણારૂપ બની છે.

રોનક જોષીએ સૌપ્રથમ ગુજરાત પ્રદૂષણ નિયંત્રણ બોર્ડ (GPCB) દ્વારા યોજાયેલી Senior Scientific Assistant (SSA)ની ભરતી પરીક્ષામાં સફળતા મેળવી હતી. આ પરીક્ષામાં તેમણે 44મો રેન્ક પ્રાપ્ત કર્યો હતો. વૈજ્ઞાનિક ક્ષેત્ર સાથે સંકળાયેલી આ ભરતીમાં મેરિટમાં સ્થાન મેળવ્યા બાદ તેમની સફળતાનો સિલસિલો આગળ પણ યથાવત રહ્યો હતો.

ત્યારબાદ તેમણે Directorate of Forensic Science, Home Department દ્વારા યોજાયેલી Laboratory Technician (Chemistry Group)ની ભરતી પરીક્ષા આપી હતી. આ પરીક્ષાના પરિણામમાં પણ રોનક જોષીએ નોંધપાત્ર પ્રદર્શન કરી 24મો રેન્ક હાંસલ કર્યો હતો. આમ, એક જ વર્ષમાં બે સરકારી ભરતી પરીક્ષાઓમાં મેરિટમાં સ્થાન મેળવી તેમણે પોતાની કારકિર્દી માટે મહત્વપૂર્ણ સિદ્ધિ હાંસલ કરી છે.

રોનક જોષીની આ બંને સફળતાઓ પાછળ કચ્છ યુનિવર્સિટીના રસાયણશાસ્ત્ર વિભાગના વિભાગાધ્યક્ષ ડૉ. વિજયકુમાર રામનું માર્ગદર્શન પણ મહત્વપૂર્ણ રહ્યું છે. યોગ્ય દિશામાં અભ્યાસ અને સતત પ્રયત્નોથી સરકારી સ્પર્ધાત્મક પરીક્ષાઓમાં સફળતા મેળવી શકાય છે તેનું ઉદાહરણ રોનકની સિદ્ધિએ પૂરું પાડ્યું છે.

તેમની આ બેવડી સફળતાથી પરિવારજનોમાં આનંદ અને ગૌરવની લાગણી જોવા મળી રહી છે. સાથે જ યુનિવર્સિટીના વિદ્યાર્થીઓ અને શિક્ષણજગતમાં પણ રોનક જોષીની સિદ્ધિની પ્રશંસા થઈ રહી છે. તેમની સફળતા અન્ય વિદ્યાર્થીઓને પણ અભ્યાસ સાથે સ્પર્ધાત્મક પરીક્ષાઓની તૈયારી માટે પ્રોત્સાહિત કરશે અને કચ્છ યુનિવર્સિટીના શૈક્ષણિક ગૌરવમાં વધુ એક સિદ્ધિનો ઉમેરો કરશે.

---------------

હિન્દુસ્થાન સમાચાર / Rohit Ramjibhai Padhiyar