સમરકંદ (ઉઝબેકિસ્તાન), નવી દિલ્હી, 26 સપ્ટેમ્બર (હિ.સ.). ચેસ ઓલિમ્પિયાડના નવમા રાઉન્ડમાં ભારત માટે શુક્રવારનો દિવસ શાનદાર રહ્યો. ભારતીય પુરુષ અને મહિલા બંને ટીમોએ પોતપોતાની મેચો જીતીને ટુર્નામેન્ટમાં પોતાની સ્થિતિ મજબૂત કરી. પુરુષ ટીમે જર્મનીને 2.5-1.5થી હરાવ્યું, જ્યારે મહિલા ટીમે યજમાન ઉઝબેકિસ્તાનને 3-1થી હરાવ્યું.

પાછલા રાઉન્ડમાં બંને ટીમોની મેચો ડ્રો રહ્યા બાદ જીત જરૂરી હતી. પુરુષ ટીમને જર્મની તરફથી સખત પડકાર મળ્યો, પરંતુ વિશ્વ ચેમ્પિયન ડી. ગુકેશની શાનદાર જીતથી ભારતને મેચ જીતવામાં મદદ મળી.

ગુકેશે ચોથા બોર્ડ પર કાળા મહોરાંથી રમતા એલેક્ઝાન્ડર ડોનચેન્કોને 54 ચાલમાં હરાવ્યો. એક સમયે મુશ્કેલ સ્થિતિમાં દેખાઈ રહેલા ગુકેશે ધીરજ જાળવી રાખી અને શાનદાર ઘોડાની ચાલ દ્વારા મેચનો પાસો પલટી નાખ્યો.

અન્ય ત્રણ મેચોમાં આર. પ્રજ્ઞાનંદ, અર્જુન એરિગૈસી અને નિહાલ સરીને પોતપોતાની મેચો ડ્રો કરી. આ જીત બાદ ભારતના 15 પોઈન્ટ થઈ ગયા છે અને તે ઓપન વર્ગમાં સંયુક્ત રીતે બીજા સ્થાને છે. ઉઝબેકિસ્તાનની બીજી ટીમ અને આર્મેનિયાના પણ 15 પોઈન્ટ છે, જ્યારે 16 પોઈન્ટ સાથે ઉઝબેકિસ્તાન ટોચ પર છે. સ્પર્ધામાં હવે બે રાઉન્ડ બાકી છે.

મહિલા ટીમની પણ શાનદાર જીત

મહિલા વર્ગમાં ભારતે યજમાન ઉઝબેકિસ્તાનને 3-1થી હરાવ્યું. કોનેરુ હમ્પીએ અફરુઝા ખામદમોવા સામે ડ્રો કર્યો, જ્યારે દિવ્યા દેશમુખે ગુલરુખબેગિમ તોખિરજોનોવા અને વંતિકા અગ્રવાલે નિલુફરખોન ઇમોમકુઝીવાને હરાવ્યા.

વળી, ટુર્નામેન્ટમાં સતત સાત જીત નોંધાવનાર બી. સવિતા શ્રીને પહેલીવાર ડ્રોથી સંતોષ માનવો પડ્યો. તેમણે ગુલદોના કરીમોવા સામેની બાજી બરાબરી પર સમાપ્ત કરી.

મહિલા વર્ગમાં પણ ભારતના 15 પોઈન્ટ છે અને તે કઝાકિસ્તાન તથા મંગોલિયા સાથે સંયુક્ત બીજા સ્થાને છે. પૂર્વ ચેમ્પિયન ચીન 17 પોઈન્ટ સાથે ટોચ પર છે.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / માધવી વ્યાસ