કાબુલ, નવી દિલ્હી, 28 સપ્ટેમ્બર (હિ.સ.): અફઘાન સંરક્ષણ મંત્રાલયે દાવો કર્યો છે કે, રવિવારે નુરિસ્તાન પ્રાંતમાં તેના સુરક્ષા દળો દ્વારા કરવામાં આવેલા ઓપરેશનમાં 28 લડવૈયાઓ માર્યા ગયા અને 32 ઘાયલ થયા. મંત્રાલય અનુસાર, પાકિસ્તાનથી સશસ્ત્ર જૂથ દ્વારા સરહદ પારથી ઘૂસણખોરી બાદ આ ઓપરેશન કરવામાં આવ્યું હતું. અફઘાન પક્ષે આરોપ લગાવ્યો હતો કે, પાકિસ્તાની લશ્કરી દળોએ ઘૂસણખોરીને સરળ બનાવી હતી.

બલુચિસ્તાનના ઓનલાઈન ન્યૂઝ નેટવર્ક, ધ બલુચિસ્તાન પોસ્ટ અનુસાર, અફઘાન સંરક્ષણ મંત્રાલયે એવો પણ આરોપ લગાવ્યો હતો કે, પાકિસ્તાની ગુપ્તચર એજન્સીઓ, સહાયના બહાને, ભૂતપૂર્વ અફઘાન સૈન્ય સૈનિકોની ભરતી કરે છે, તેમને તાલીમ આપે છે અને પછી તેમને નુરિસ્તાન મોકલે છે. આ આરોપોની સ્વતંત્ર રીતે પુષ્ટિ થઈ શકી નથી.

એક દિવસ પહેલા, શનિવારે, અફઘાન અધિકારીઓએ જણાવ્યું હતું કે, સરહદ સુરક્ષા દળોએ કામદેશ જિલ્લામાં ડ્યુરન્ડ લાઇન નજીક ઘૂસણખોરીના પ્રયાસને નિષ્ફળ બનાવ્યો હતો, જેમાં 10 લડવૈયાઓ માર્યા ગયા હતા અને છની ધરપકડ કરવામાં આવી હતી. અધિકારીઓએ આરોપ લગાવ્યો હતો કે, અફઘાનિસ્તાન ફ્રીડમ ફ્રન્ટ (એએફએફ) ના કેટલાક સભ્યો ઇસ્લામિક સ્ટેટ સાથે સહયોગમાં કામ કરી રહ્યા હતા.

જોકે, એએફએફ એ ઘટનાઓનો અલગ અહેવાલ આપ્યો હતો. સંગઠનના જણાવ્યા અનુસાર, તાલિબાન દળોએ શનિવારે સવારે ડ્રોનથી તેના સ્થાનો પર હુમલો કર્યો, ત્યારબાદ તેના લડવૈયાઓએ વળતો જવાબ આપ્યો અને અનેક ચોકીઓ પર કબજો કર્યો. એએફએફ એ દાવો કર્યો હતો કે, તાલિબાન દળો અરંડુ અને કામદેશના કેટલાક ભાગોથી પડોશી કુનાર પ્રાંતના નારી જિલ્લા તરફ પીછેહઠ કરી હતી.

લડાઈ પછી સામે આવેલા વીડિયોમાં અટકાયતીઓએ જણાવ્યું હતું કે, તેમને ઈરાનથી પાકિસ્તાનના ચિત્રાલ લઈ જવામાં આવ્યા હતા, જ્યાં તેમને પાકિસ્તાની લશ્કરી છાવણીઓમાં તાલીમ આપવામાં આવી હતી. આ નિવેદનોની સ્વતંત્ર રીતે ચકાસણી કરી શકાઈ નથી.

આ ઘટનાક્રમ 21 સપ્ટેમ્બરના રોજ પાકિસ્તાન દ્વારા અફઘાનિસ્તાનમાં હવાઈ હુમલા કર્યાના થોડા દિવસો પછી જ આવ્યો છે. પાકિસ્તાને તે હુમલાઓમાં 28 આતંકવાદીઓને માર્યા ગયા હોવાનો દાવો કર્યો હતો. દરમિયાન, અફઘાન અધિકારીઓએ જણાવ્યું હતું કે હુમલામાં ત્રણ નાગરિકો માર્યા ગયા છે. અફઘાનિસ્તાનમાં સંયુક્ત રાષ્ટ્ર સહાય મિશન (યુએનએએમએ) એ એક પુરુષ, એક મહિલા અને એક છોકરીના મોતની પુષ્ટિ કરી છે.

હિન્દુસ્થાન સમાચાર / અમરેશ દ્વિવેદી

હિન્દુસ્થાન સમાચાર / ડો.હિતેશ એન.વ્યાસ