નવી દિલ્હી, 28 સપ્ટેમ્બર (હિ.સ.). વડા પ્રધાન નરેન્દ્ર મોદીએ, વિશ્વ હિન્દુ પરિષદ (વીએચપી) ના ભૂતપૂર્વ આંતરરાષ્ટ્રીય કાર્યકારી પ્રમુખ અશોક સિંઘલને તેમની જન્મ શતાબ્દી પર યાદ કરતાં કહ્યું કે, તેમનું જીવન સમાજ, સંસ્કૃતિ અને રાષ્ટ્ર માટે સમર્પિત હતું. તેમણે સિંઘલના સંગઠનાત્મક કૌશલ્ય, સામાજિક સંવાદિતા પ્રત્યે પ્રતિબદ્ધતા અને રામ જન્મભૂમિ ચળવળમાં તેમની ભૂમિકાને પણ યાદ કરી.

એક લેખમાં, વડા પ્રધાને કહ્યું કે, સિંઘલનું જીવન એ ભાવનાનું ઉદાહરણ છે કે વ્યક્તિએ પોતાની સિદ્ધિઓ કરતાં જન કલ્યાણ માટે સમર્પિત જીવનને વધુ મૂલ્ય આપવું જોઈએ. એક કહેવતનો ઉલ્લેખ કરતા તેમણે કહ્યું કે, જેમ વૃક્ષો તેમના ફળો રાખતા નથી અને નદીઓ પોતાનું પાણી પોતાના માટે રાખતી નથી, તેવી જ રીતે સંત વૃતિના લોકો બીજાઓની સેવા કરવા માટે પોતાનું જીવન સમર્પિત કરે છે.

મોદીએ કહ્યું કે, 27 સપ્ટેમ્બરના રોજ અશોક સિંઘલના જન્મ શતાબ્દી વર્ષની શરૂઆત થઈ. વ્યક્તિગત યાદો અને સિંઘલ સાથેના તેમના લાંબા જોડાણને શેર કરતા, તેમણે 1981 ની એક ઘટના યાદ કરી જ્યારે તેમને સિંઘલ તરફથી હસ્તલિખિત પત્ર મળ્યો. પ્રધાનમંત્રીએ કહ્યું કે, સિંઘલ દેશના દૂરના વિસ્તારોમાં પ્રવાસ કરતા હતા અને વંચિતો અને હાંસિયામાં ધકેલાઈ ગયેલા લોકો માટે કામ કરવા પર સતત ધ્યાન કેન્દ્રિત કરતા હતા. તેમણે 2001ના કચ્છ ભૂકંપ પછી સિંઘલ સાથેના પોતાના અનુભવને પણ યાદ કર્યો.

પ્રધાનમંત્રીએ કહ્યું કે, શ્રીમંત પરિવારમાંથી આવતા હોવા છતાં, સિંઘલ એ એક અલગ રસ્તો પસંદ કર્યો અને સમાજ અને સંસ્કૃતિ માટે પોતાનું જીવન સમર્પિત કર્યું. પ્રયાગરાજ અને કાશી સાથેના તેમના જોડાણનો ઉલ્લેખ કરતા મોદીએ કહ્યું કે, સિંઘલને આધ્યાત્મિક અભ્યાસ, શિક્ષણ, ખાસ કરીને વૈદિક શિક્ષણ અને સંગીત પ્રત્યે ઊંડો જુસ્સો હતો. તેમણે બીએચયુ માં અભ્યાસ કર્યો હતો અને એકલ વિદ્યાલય પહેલમાં પણ સામેલ હતા.

સિંઘલના સંગઠનાત્મક કૌશલ્યનો ઉલ્લેખ કરતા, મોદીએ 1993માં સ્વામી વિવેકાનંદના શિકાગો ભાષણની શતાબ્દી અને પોર્ટ ઓફ સ્પેન, ત્રિનિદાદ અને ટોબેગોમાં 2000ના વિશ્વ હિન્દુ પરિષદની ઉજવણી માટે યુનાઇટેડ સ્ટેટ્સમાં આયોજિત સંમેલનના પ્રસંગો શેર કર્યા. તેમણે કહ્યું કે, સિંઘલ તેમના સાથીદારો પ્રત્યે પ્રેમાળ હતા અને તેમના પ્રોત્સાહનથી કામદારોમાં નવી ઊર્જાનો સંચાર થયો હતો.

રામ જન્મભૂમિ ચળવળમાં સિંઘલની ભૂમિકાનો ઉલ્લેખ કરતા પ્રધાનમંત્રીએ કહ્યું કે, 1991 માં બોટ ક્લબ રેલીમાં તેમનું ભાષણ અને આંદોલન દરમિયાન ઘાયલ થયેલા તેમની છબી લાંબા સમય સુધી યાદ રહેશે. તેમણે કહ્યું કે, અયોધ્યામાં રામ મંદિરના નિર્માણ પાછળ સિંઘલ જેવા મહાન વ્યક્તિઓનું સમર્પણ હતું. મોદીએ સામાજિક સંવાદિતા પર સિંઘલના ભારનો પણ ઉલ્લેખ કરતા કહ્યું કે, તેઓ સમાજમાં ભેદભાવની વિરુદ્ધ હતા અને બધા માટે સમાન ગૌરવ અને આદરની હિમાયત કરતા હતા.

પ્રધાનમંત્રીએ કહ્યું કે, રાષ્ટ્રનિર્માણની સાથે, સિંઘલ શિક્ષણ અને સંગીત પર પણ વિશેષ મહત્વ આપતા હતા. તેમણે યુવાનોને અભ્યાસ માટે પ્રેરણા આપી હતી અને પોતે એક સારા ગાયક હતા. મોદીએ કહ્યું કે, સિંઘલના આદર્શો આજે પણ આપણને પ્રેરણા આપે છે અને તેમની જન્મશતાબ્દી નિમિત્તે, યુવાનોને તેમના જીવન અને કાર્યથી પરિચિત કરાવવાના પ્રયાસો કરવા જોઈએ.

હિન્દુસ્થાન સમાચાર / સુશીલ કુમાર / અનુપ શર્મા

હિન્દુસ્થાન સમાચાર / ડો.હિતેશ એન.વ્યાસ