નવી દિલ્હી, 29 સપ્ટેમ્બર (હિ.સ.) કેન્દ્રીય તપાસ બ્યુરો (સીબીઆઈ)એ 2021ના પશ્ચિમ બંગાળ ચૂંટણી પછીની હિંસા સંબંધિત હત્યાના કેસમાં ઘોષિત અપરાધી ઝરણા મિસ્ત્રીની મંગળવારે ધરપકડ કરી. ઝરણા મિસ્ત્રી, સહ-આરોપી સંજય મિસ્ત્રીની પત્ની છે અને 2021માં એફઆઈઆર નોંધાયા બાદથી ફરાર હતી. સીબીઆઈએ તેની ધરપકડ પર 50 હજાર રૂપિયાનું ઇનામ જાહેર કર્યું હતું.

સીબીઆઈના જણાવ્યા અનુસાર, ઝરણા મિસ્ત્રીની દક્ષિણ 24 પરગણા જિલ્લાના સંતોષપુર સ્થિત ઘોષપાડામાંથી ધરપકડ કરવામાં આવી. તે કેસની તપાસ અને સુનાવણીની પ્રક્રિયામાં ક્યારેય સામેલ થઈ ન હતી. ધરપકડ બાદ તેને મંગળવારે બેરકપુર સ્થિત સક્ષમ અદાલતમાં રજૂ કરવામાં આવી રહી છે.

કલકત્તા ઉચ્ચ ન્યાયાલયના 19 ઓગસ્ટ 2021ના આદેશના પાલનમાં સીબીઆઈએ 27 ઓગસ્ટ 2021ના રોજ આ કેસ નોંધ્યો હતો. એજન્સીએ ઉત્તર 24 પરગણા જિલ્લાના જગદ્દલ પોલીસ સ્ટેશનમાં 3 મે 2021ના રોજ નોંધાયેલ એફઆઈઆર નંબર 345/2021ને પોતાના હાથમાં લીધો હતો. એફઆઈઆર ચૂંટણી પછીની હિંસા સંબંધિત હતી અને ફરિયાદકર્તાની માતા શોભા રાણી મંડલની હત્યાના આરોપો લગાવવામાં આવ્યા હતા.

તપાસ પૂરી કર્યા પછી સીબીઆઈએ 29 ડિસેમ્બર 2021ના રોજ કુલ 13 આરોપીઓ વિરુદ્ધ પૂરક આરોપપત્ર દાખલ કર્યું હતું. આમાં ઝરણા મિસ્ત્રી પણ સામેલ હતી.

સીબીઆઈના જણાવ્યા અનુસાર, ઝરણા મિસ્ત્રીના છુપાઈ જવા અને સુનાવણીની પ્રક્રિયાથી બચવાને કારણે, બેરકપુરના વધારાના મુખ્ય ન્યાયિક દંડાધિકારીએ 3 ઓક્ટોબર 2023ના આદેશથી તેને ઘોષિત અપરાધી જાહેર કરી હતી.

હિન્દુસ્થાન સમાચાર / પ્રશાંત શેખર / અનૂપ શર્મા

હિન્દુસ્થાન સમાચાર / માધવી વ્યાસ