આઇચી-નાગોયા, નવી દિલ્હી, 29 સપ્ટેમ્બર (હિ.સ.). ભારતના તીરંદાજ ધીરજ બોમ્મદેવરા અને નીરજ ચૌહાણે, મંગળવારે એશિયન ગેમ્સ 2026માં પુરુષોની રિકર્વ વ્યક્તિગત સ્પર્ધાના ક્વાર્ટર ફાઇનલમાં સ્થાન મેળવી લીધું. બંનેએ રાઉન્ડ ઓફ 16માં શાનદાર જીત નોંધાવી.

શીર્ષ વરીય ધીરજે ચાઈનીઝ તાઈપેઈના ચેંગ હ્સિયાંગ-હુઈને 6-2થી હરાવ્યા. ધીરજે આ પહેલા રાઉન્ડ ઓફ 32માં ફિલિપાઈન્સના ગિર્વિન ગાર્સિયાને 6-0થી હરાવ્યા હતા. ચેંગ સામેની મેચમાં ધીરજને સખત પડકાર મળ્યો, પરંતુ તેમણે દબાણમાં સંયમ જાળવી રાખીને જીત મેળવી. હવે ક્વાર્ટર ફાઇનલમાં તેમનો મુકાબલો ઉઝબેકિસ્તાનના અમિરકોન સાદિકોવ સામે 3 ઓક્ટોબરે થશે.

જ્યારે, નીરજ ચૌહાણે રાઉન્ડ ઓફ 16માં દક્ષિણ કોરિયાના કિમ જે દેઓકને 6-4થી હરાવીને મોટો અપસેટ સર્જ્યો. કિમ અનેક વખત ઓલિમ્પિક મેડલ વિજેતા છે અને રેન્કિંગ રાઉન્ડમાં બીજા સ્થાને રહ્યા હતા.

નીરજે મેચની સારી શરૂઆત કરતા 3-1ની લીડ બનાવી, પરંતુ કિમે વાપસી કરતા સ્કોર 3-3 કરી દીધો. ત્યારબાદ એક સેટ બરાબરી પર રહેતા સ્કોર 4-4 થઈ ગયો. નિર્ણાયક સેટમાં નીરજે દબાણ વચ્ચે શાનદાર સંયમ દર્શાવ્યો અને સેટ જીતીને મેચ 6-4થી પોતાના નામે કરી. ક્વાર્ટર ફાઇનલમાં નીરજનો મુકાબલો ભૂટાનના દોરજી લામ સામે થશે.

ધીરજે રાઉન્ડ ઓફ 32માં ગાર્સિયા સામે પણ શાનદાર પ્રદર્શન કર્યું હતું. તેમણે ત્રણેય સેટ જીતીને 6-0થી મેચ પોતાના નામે કરી અને કુલ નવ તીરોમાં જ જીત નોંધાવી લીધી હતી. તેમના નવમાંથી છ તીર 10 અંકવાળા નિશાન પર લાગ્યા હતા.

આ દરમિયાન, ભારતનું સર્ફિંગ અભિયાન પણ સમાપ્ત થઈ ગયું. કિશોર કુમાર અનબરાસુને પુરુષોના શોર્ટબોર્ડ ક્વાર્ટર ફાઇનલમાં ફિલિપાઈન્સના ટોબી એસ્પેજોન સામે હારનો સામનો કરવો પડ્યો. કિશોરે આઠ લહેરોમાં પોતાના બે સર્વશ્રેષ્ઠ સ્કોર 3.00 અને 2.37 મેળવ્યા અને કુલ 5.37 અંક બનાવ્યા, જ્યારે એસ્પેજોને 8.53 અંક એકઠા કર્યા.

મંગળવારે ભારતને એથ્લેટિક્સ, બોક્સિંગ અને શૂટિંગ સહિત અનેક રમતોમાં મેડલની આશાઓ છે.

ગુલવીર સિંહ પુરુષોની 5000 મીટર ફાઇનલમાં ઉતરશે. તેઓ આ પહેલા 1500 અને 10,000 મીટરમાં રજત પદક જીતી ચૂક્યા છે. અવિનાશ સાબલે પણ 5000 મીટરમાં પડકાર રજૂ કરશે.

બોક્સિંગમાં પરવીન હુડ્ડા, અંકુશ પંઘાલ અને નરેન્દ્ર બેરવાલ પોતપોતાના સેમિફાઇનલ મુકાબલા રમશે અને ત્રણેયનો મેડલ પાક્કો થઈ ચૂક્યો છે. પરવીનનો મુકાબલો મહિલાઓની 65 કિગ્રા સેમિફાઇનલમાં ચીનની લી શૂ સામે, અંકુશનો પુરુષોના 80 કિગ્રામાં ઉઝબેકિસ્તાનના ફઝલિદ્દીન એરકિનબોયેવ સામે અને નરેન્દ્રનો પુરુષોના 90 કિગ્રામાં કઝાકિસ્તાનના ઐબેક ઓરલબાય સામે થશે.

ભારતની ટીમો શૂટિંગ, સ્ક્વોશ, વોલીબોલ, ટેનિસ, સાયકલિંગ, કેનો સ્લાલમ, સ્પોર્ટ ક્લાઇમ્બિંગ અને કુરાશમાં પણ પડકાર રજૂ કરશે.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / માધવી વ્યાસ