-એશિયન ગેમ્સ 2026માં ભારતનો આ સાતમો સુવર્ણ.

આઇચી-નાગોયા, નવી દિલ્હી, 30 સપ્ટેમ્બર (હિ.સ.). ભારતીય મહિલા કમ્પાઉન્ડ તીરંદાજી ટીમે, એશિયન ગેમ્સ 2026માં શાનદાર પ્રદર્શન કરતા બુધવારે સુવર્ણ પદક જીતી લીધો. જ્યોતિ સુરેખા વેન્નમ, પૃથિકા પ્રદીપ અને તનીપર્થી ચિકિતાની ભારતીય ટીમે બુધવારે ફાઇનલમાં ચીનને 238-234થી હરાવીને ખિતાબ પોતાના નામે કર્યો.

આ જીત સાથે ભારતે મહિલાઓની કમ્પાઉન્ડ ટીમ સ્પર્ધામાં પોતાનો એશિયન ગેમ્સ ખિતાબ જાળવી રાખ્યો.

ભારતીય ટીમે મુકાબલામાં શરૂઆતથી જ દબાણ જાળવી રાખ્યું અને અંત સુધી પોતાની લીડ કાયમ રાખી. ભારતે પહેલા રાઉન્ડ પછી 60-58ની લીડ બનાવી, જે બીજા રાઉન્ડ પછી 119-116 અને ત્રીજા રાઉન્ડ પછી 178-175 થઈ ગઈ. અંતિમ રાઉન્ડમાં ભારતીય તીરંદાજોએ સતત સચોટ નિશાન લગાવીને ચીનને વાપસીનો કોઈ મોકો આપ્યો નહીં.

ફાઇનલના છેલ્લા રાઉન્ડમાં ચિકિતા, પૃથિકા અને જ્યોતિએ સતત 10-10 અંક મેળવ્યા. ચીને પણ અંતિમ રાઉન્ડમાં ત્રણ 10 લગાવ્યા, પરંતુ ભારતીય ટીમની લીડ એટલી મજબૂત હતી કે તે સુવર્ણ પદક પોતાના નામે કરવામાં સફળ રહી.

આ પ્રદર્શન સાથે ભારતીય ટીમે વિશ્વ રેકોર્ડની બરાબરી પણ કરી. ભારતે તે રેકોર્ડની બરાબરી કરી, જે દક્ષિણ કોરિયાએ 2014 ઇંચિયોન એશિયન ગેમ્સમાં બનાવ્યો હતો.

ભારતે આ સ્પર્ધામાં આ પહેલા 2018માં રજત અને 2014માં કાંસ્ય પદક જીત્યો હતો. હવે સતત બીજી વાર સુવર્ણ જીતીને ભારતીય મહિલા કમ્પાઉન્ડ ટીમે એશિયન ગેમ્સમાં પોતાનો દબદબો કાયમ કર્યો છે.

**જ્યોતિનો અનુભવ અને સિદ્ધિઓનો સિલસિલો**

ભારતીય ટીમની સૌથી અનુભવી સભ્ય જ્યોતિ સુરેખા વેન્નમ લાંબા સમયથી દેશના મુખ્ય કમ્પાઉન્ડ તીરંદાજોમાં સામેલ છે. તેમણે 2011થી આંતરરાષ્ટ્રીય સ્તરે ભારતનું પ્રતિનિધિત્વ કર્યું છે. જ્યોતિએ 2023 એશિયન ગેમ્સમાં વ્યક્તિગત અને ટીમ સ્પર્ધાઓમાં બે સુવર્ણ પદક જીત્યા હતા. આ ઉપરાંત તેમણે 2023 વિશ્વ તીરંદાજી ચેમ્પિયનશિપમાં ટીમ સુવર્ણ અને વિશ્વ કપના તબક્કાઓમાં 11 સુવર્ણ પદક જીત્યા છે. એશિયન આઉટડોર ચેમ્પિયનશિપમાં પણ તેમના નામે સાત સુવર્ણ પદક છે. તેમની શાનદાર કારકિર્દીને જોતા તેમને 2017માં અર્જુન પુરસ્કારથી સન્માનિત કરવામાં આવ્યા.

**ચિકિતાએ નાની ઉંમરે ઓળખ બનાવી**

તનીપર્થી ચિકિતાએ, નાની ઉંમરે જ આંતરરાષ્ટ્રીય સ્તરે પોતાની ઓળખ બનાવી લીધી છે. તેલંગાણાની આ તીરંદાજે 2025 વિશ્વ તીરંદાજી યુવા ચેમ્પિયનશિપમાં અંડર-21 મહિલા વ્યક્તિગત વર્ગનો સુવર્ણ પદક જીતીને ઇતિહાસ રચ્યો હતો. તે આ સ્પર્ધામાં વ્યક્તિગત સુવર્ણ જીતનારી પ્રથમ ભારતીય મહિલા બની.

ખેડૂત પરિવારમાંથી આવતી ચિકિતાએ પોતાના પિતાની પ્રેરણાથી બીજી કક્ષામાં તીરંદાજી શરૂ કરી હતી. વર્ષ 2018માં તેમણે તેને ગંભીરતાથી અપનાવ્યું અને 2021માં વ્યાવસાયિક સ્તરે પગ મૂક્યો. તે 2025 અને 2026 વિશ્વ કપમાં ટીમ સ્પર્ધાના બે રજત પદક સહિત એશિયન ગ્રાં પ્રીમાં પણ ઘણા પદક જીતી ચૂકી છે.

**પૃથિકા માટે મોટી સિદ્ધિ**

પૃથિકા પ્રદીપ, ભારતીય કમ્પાઉન્ડ તીરંદાજીની ઉભરતી પ્રતિભા છે. તેમણે પાંચમી કક્ષામાં શોખ તરીકે તીરંદાજી શરૂ કરી અને છઠ્ઠી કક્ષાથી વ્યાવસાયિક તાલીમ લેવાનું શરૂ કર્યું. 2025માં આંતરરાષ્ટ્રીય પદાર્પણ પછી તે અત્યાર સુધી સાત આંતરરાષ્ટ્રીય પદક—એક સુવર્ણ, પાંચ રજત અને એક કાંસ્ય જીતી ચૂકી છે.

તેમની સિદ્ધિઓમાં 2025 વિશ્વ તીરંદાજી યુવા ચેમ્પિયનશિપના બે રજત, 2025 અને 2026 વિશ્વ કપના બે રજત અને એક કાંસ્ય તથા 2025 એશિયન આઉટડોર ચેમ્પિયનશિપનો એક સુવર્ણ અને એક રજત પદક સામેલ છે. તે પુણેની સ્વરાજ આર્ચરી એકેડમીમાં તાલીમ લે છે.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / માધવી વ્યાસ