હૈદરાબાદ, નવી દિલ્હી, 8 સપ્ટેમ્બર (હિ.સ.). પોલીસે મંગળવારે સવારે હૈદરાબાદના નવા એમએલએ ક્વાર્ટર્સમાંથી બીઆરએસ એમએલસી તાટા મધુની સ્પીકર ગદ્દમ પ્રસાદ કુમાર વિરુદ્ધ અપમાનજનક ટિપ્પણી કરવા બદલ ધરપકડ કરી હતી. તેમને નારાયણગુડા પોલીસ સ્ટેશન લઈ જવામાં આવ્યા હતા. તેમની સામે એસસી/એસટી અત્યાચાર નિવારણ અધિનિયમ હેઠળ કેસ નોંધવામાં આવ્યો છે.

તેમને નામપલ્લી કોર્ટમાં રજૂ કરવામાં આવે તેવી અપેક્ષા છે. સ્પીકરના ઓએસડી પોલેમપલ્લી વેંકટેશમ દ્વારા દાખલ કરાયેલી ફરિયાદના આધારે મધુની ધરપકડ કરવામાં આવી હતી. પોલીસે કોકાપેટ સ્થિત તેમના નિવાસસ્થાનેથી બીઆરએસ એમએલસી નવીન રેડ્ડીની પણ અટકાયત કરી હતી.

સ્પીકર ગદ્દમ પ્રસાદ કુમાર વિરુદ્ધ કરવામાં આવેલી અપમાનજનક ટિપ્પણી બાદ, મુખ્યમંત્રી એ. રેવંત રેડ્ડીએ સોમવારે વિધાન પરિષદના અધ્યક્ષ ગુત્તા સુખેન્દ્ર રેડ્ડીને માંગ કરી હતી કે, બીઆરએસ એમએલસી ટાટા મધુસુધનને તાત્કાલિક બરતરફ કરવામાં આવે અને ઉપલા ગૃહમાંથી હાંકી કાઢવામાં આવે. મુખ્યમંત્રીએ કહ્યું કે આ માત્ર પ્રસાદ કુમારનું વ્યક્તિગત અપમાન નથી, પરંતુ સ્પીકરના પદ, ગૃહ અને સમગ્ર તેલંગાણાની ગરિમાનું પણ અપમાન છે. રેવંત રેડ્ડીએ આ દિવસને કાળો દિવસ ગણાવતા કહ્યું કે, એમએલસી મધુસુધન દ્વારા સ્પીકર અને તેમના પરિવાર વિરુદ્ધ ઉપયોગમાં લેવાયેલી ભાષા અક્ષમ્ય છે.

સોમવારે, સુરક્ષા કર્મચારીઓએ બીઆરએસ નેતાઓને શાસક કોંગ્રેસ સરકારને નિશાન બનાવતા વિરોધ ટી-શર્ટ પહેરીને વિધાનસભામાં પ્રવેશતા અટકાવ્યા. આ ટી-શર્ટ પર કોંગ્રેસ તેની ગેરંટી લાગુ કરવામાં નિષ્ફળ ગઈ છે અને 1,000 દિવસનું શાસન સંપૂર્ણ નિષ્ફળ ગયું છે જેવા સૂત્રો લખેલા હતા. તેલંગાણા વિધાનસભાનું ચોમાસુ સત્ર સોમવારે શરૂ થયું. પહેલા જ દિવસે, બીઆરએસ ધારાસભ્યોએ ગૃહની બહાર ભારે હંગામો મચાવ્યો. રાજ્યના અનેક ભાગોમાં બીઆરએસ કાર્યકરોએ પોલીસ દ્વારા બળપ્રયોગ સામે વિરોધ પ્રદર્શન કર્યું અને રેવંત સરકારના પુતળા બાળ્યા.

હિન્દુસ્થાન સમાચાર / દેવ કુમાર પુખરાજ / મુકુંદ

હિન્દુસ્થાન સમાચાર / માધવી વ્યાસ