દમિશ્ક, નવી દિલ્હી, 8 ડિસેમ્બર (હિ.સ.). સીરિયામાં સતત વિસ્ફોટક પરિસ્થિતિ ત્યારે વધુ વણસી જ્યારે સમાચાર ફેલાતા હતા કે, રાષ્ટ્રપતિ બશર અલ-અસદ વિમાનમાં બેસીને અજ્ઞાત ગંતવ્ય તરફ રવાના થયા છે. આ પછી દમિશ્ક ઇન્ટરનેશનલ એરપોર્ટ પર ગભરાટ અને અરાજકતાનો માહોલ છે. રાષ્ટ્રપતિ બશરના વફાદાર દેશ છોડીને ભાગી જવાનો પ્રયાસ કરી રહ્યા છે. બીજી તરફ દેશના મુખ્ય શહેર હોમ્સ પર કબજો કર્યા બાદ, વિદ્રોહી લડવૈયાઓ દમિશ્ક તરફ આગળ વધી રહ્યા છે અને સેના તેમને રોકવામાં સદંતર નિષ્ફળ સાબિત થઈ રહી છે.

સીરિયાની રાજધાની દમિશ્કની સ્થિતિ હાલમાં વિસ્ફોટક છે. બળવાખોરોના સમર્થકોમાં ભારે ઉત્તેજના છે, કારણ કે તેઓ દમિશ્કની નજીક જતા રહ્યા છે અને ત્યાં પરિવારના સત્તાના પ્રતીકો અને રાષ્ટ્રપતિ બશર અલ-અસદની મૂર્તિઓ તોડી પાડવાની ઘટનાઓ બની છે. જોકે, સીરિયાના ગૃહ મંત્રાલયે દાવો કર્યો છે કે, રાજધાનીની આસપાસ મજબૂત સુરક્ષા ઘેરો છે. પરંતુ દેશભરમાં બળવાખોર જૂથો દ્વારા કબજે કરાયેલા શહેરો, નગરો અને ગામડાઓને સુરક્ષા આપવામાં સેના નિષ્ફળ રહી છે.

સીરિયામાં 2011માં શરૂ થયેલા ગૃહયુદ્ધ દરમિયાન પણ વિદ્રોહીઓ હોમ્સ પર કબજો કરી શક્યા નહોતા, પરંતુ આ વખતે વિદ્રોહીઓએ શહેર પર કબજો કરી લીધો હતો. સીરિયામાં વિદ્રોહીઓએ ત્રણ મોટા શહેરો હમા, અલેપ્પો અને દારા પર કબજો કરી લીધો છે અને હવે તેઓ રાજધાની દમિશ્ક તરફ આગળ વધી રહ્યા છે. સીરિયામાં પ્રથમ વખત, સરકાર પાસે હવે દમિશ્ક, લતાકિયા અને ટાર્ટસ સહિત 14 પ્રાંતીય રાજધાનીઓમાંથી માત્ર ત્રણ પર નિયંત્રણ છે.

24 વર્ષથી દેશ પર શાસન કરી રહેલા રાષ્ટ્રપતિ બશર અલ-અસદ, છેલ્લા ઘણા દિવસોથી જાહેરમાં જોવા મળ્યા નથી. તેના વિશે એવા મજબૂત અહેવાલો છે કે, તેઓ પ્લેનમાં બેસીને કોઈ અજાણી જગ્યાએ રવાના થઈ ગયા છે. જો કે, રાષ્ટ્રપતિ કાર્યાલયે આવા અહેવાલોને નકારી કાઢ્યા છે અને કહ્યું છે કે, તેઓ દમિશ્કમાં રહીને પણ નિયમિત રીતે કામ કરી રહ્યા છે.

હિન્દુસ્થાન સમાચાર / સંજીવ પાશ

હિન્દુસ્થાન સમાચાર / માધવી વ્યાસ