નવી દિલ્હી, 22 ઓક્ટોબર (હિ.સ.). બોલીવુડ અભિનેતા ગોવર્ધન અસરાનીના અવસાન બાદ, ફિલ્મ ઉદ્યોગમાંથી વધુ એક દુ:ખદ સમાચાર સામે આવ્યા છે. પ્રખ્યાત અભિનેતા અને ગાયક ઋષભ ટંડનનું, આજે અહીં હૃદયરોગના હુમલાને કારણે અવસાન થયું. તેઓ 35 વર્ષના હતા. ઋષભ ટંડન, જેઓ તેમના સ્ટેજ નામ ફકીર થી પણ જાણીતા છે, તેમણે ભારતીય ફિલ્મ અને સંગીત ઉદ્યોગને આઘાત પહોંચાડ્યો છે. ઋષભ ટંડનના એક નજીકના મિત્રએ સોશિયલ મીડિયા પર તેમના મૃત્યુની પુષ્ટિ કરી. તેમણે કહ્યું કે, ઋષભ દિવાળી ઉજવવા માટે તેમના પરિવાર સાથે મુંબઈથી દિલ્હી આવ્યા હતા, ત્યારે તેમને અચાનક હૃદયરોગનો હુમલો આવ્યો. ડોકટરોના શ્રેષ્ઠ પ્રયાસો છતાં, તેઓ ફરી શક્યા નહીં.

ઋષભ ટંડનના અકાળ અવસાનથી માત્ર તેમના પરિવારને જ નહીં પરંતુ તેમના ચાહકોને પણ ખૂબ જ આઘાત લાગ્યો છે. ચાહકો સોશિયલ મીડિયા પર તેમના જૂના વીડિયો, ગીતો અને યાદો સતત શેર કરી રહ્યા છે. ઘણા લોકોએ તેમને અવાજનો ફકીર કહીને શ્રદ્ધાંજલિ આપી છે. ઋષભ ટંડનના ગીતોમાં ભક્તિ અને સમર્પણ પ્રતિબિંબિત થાય છે. તેમના સૌથી લોકપ્રિય ગીત, શિવ તાંડવ સ્તોત્રમ એ તેમને એક નવી ઓળખ આપી. આ ગીતે સોશિયલ મીડિયા અને સંગીત પ્લેટફોર્મ પર લાખો વ્યૂઝ મેળવ્યા, જેનાથી તેમને રાષ્ટ્રીય ખ્યાતિ મળી. તેમના અન્ય હિટ ગીતોમાં ધૂ ધૂ કરકે, ફકીર કી ઝુબાની, અને યે આશિકી શામેલ છે. તેમના અવાજમાં એક અનોખી ઊંડાણ અને ભાવના હતી, જે તેમને સમકાલીન ગાયકોથી અલગ પાડે છે.

ઋષભ માત્ર એક કલાકાર જ નહીં, પણ ભગવાન શિવના કટ્ટર ભક્ત પણ હતા. તેઓ ઘણીવાર ઇન્ટરવ્યુ અને સોશિયલ મીડિયા પોસ્ટ્સમાં કહેતા હતા કે, મહાદેવ તેમની પ્રેરણા અને ઉર્જાના સ્ત્રોત હતા. શિવ પ્રત્યેની તેમની ભક્તિ તેમના ગીતોમાં સ્પષ્ટપણે દેખાતી હતી. તેમણે એક વખત કહ્યું હતું કે, જો મારા ગીતોમાં શાંતિ છે, તો તે શિવની કૃપાને કારણે છે.

સોશિયલ મીડિયા પર તેમનો મોટો ચાહક વર્ગ હતો.

'ફકીર' તરીકે જાણીતા ઋષભના સોશિયલ મીડિયા પ્લેટફોર્મ પર લાખો ફોલોઅર્સ હતા. તેમના ચાહકો તેમના લાઇવ સત્રો અને આધ્યાત્મિક સંગીતની આતુરતાથી રાહ જોતા હતા. તેઓ ઘણીવાર સોશિયલ મીડિયા પર જીવન, પ્રેમ અને આધ્યાત્મિકતા પર આંતરદૃષ્ટિ શેર કરતા હતા, જેના કારણે તેઓ યુવાનોમાં લોકપ્રિય બન્યા હતા. સંગીત ઉદ્યોગની ઘણી અગ્રણી હસ્તીઓએ તેમના નિધન પર શોક વ્યક્ત કર્યો છે. ઘણા સંગીત દિગ્દર્શકોએ તેમને એક સાચા કલાકાર તરીકે વર્ણવ્યા હતા જે વ્યાપારી સફળતા કરતાં આધ્યાત્મિક સંગીતમાં વધુ માનતા હતા.

હિન્દુસ્થાન સમાચાર / લોકેશ ચંદ્ર દુબે / પવન કુમાર

હિન્દુસ્થાન સમાચાર / માધવી વ્યાસ