ડ્રાઈવરની સમયસૂચકતા કારણે મોટી જાનહાનિ ટળી

અમરેલી, 13 નવેમ્બર (હિ.સ.) : અમરેલી જિલ્લાના ચિતલ નજીક આજે સવારે એક ગંભીર માર્ગ અકસ્માત બન્યો હતો. ટ્રકની બ્રેક ફેઈલ થવાથી વાહન બેકાબૂ બની જતાં રસ્તા કિનારે આવેલી દુકાનો અને બાઇકોને ટક્કર મારી દીધી હતી. અકસ્માત એટલો જોરદાર હતો કે અનેક બાઇકો કચ્ચરઘાણ બની ગઈ અને દુકાનના છાપરાં તૂટી પડ્યાં. સદભાગ્યે, મોટી જાનહાનિ ટળી છે.

પ્રાથમિક માહિતી અનુસાર ચિતલ નજીકથી પસાર થતો એક ટ્રક અચાનક બ્રેક ફેઈલ થતાં નિયંત્રણ ગુમાવી બેઠો હતો. ટ્રક સીધો રસ્તા પર ઉભી 7 થી 8 બાઇકો અને દુકાનના ભાગમાં ઘૂસી ગયો હતો. તે સમયે વિસ્તાર ભીડભાડવાળો હોવાથી દુકાનદારો અને સ્થાનિક લોકોએ જાન બચાવવા ભાગદોડ મચાવી દીધી હતી. ટ્રકના બેકાબૂ થતાં પણ ડ્રાઈવરે સમયસૂચકતા દાખવી ટ્રકને એક બાજુ વાળી આપતા મોટી દુર્ઘટના થવાથી બચી ગયો. આ દરમિયાન ડ્રાઈવર જાતે ઈજાગ્રસ્ત બન્યો હતો અને તેને સારવાર માટે નજીકની હોસ્પિટલમાં ખસેડવામાં આવ્યો છે. અકસ્માતની જાણ થતા ચિતલ પોલીસ તાત્કાલિક સ્થળ પર પહોંચી ટ્રાફિક નિયંત્રિત કરી અને નુકસાનની ગણતરી શરૂ કરી. પોલીસના જણાવ્યા મુજબ, ટ્રકની બ્રેક સિસ્ટમમાં ટેક્નિકલ ખામીને કારણે આ ઘટના બની હોવાનું પ્રાથમિક તારણ આવ્યું છે.

આ ઘટના બાદ ચિતલ અને આસપાસના વિસ્તારમાં ભયનો માહોલ જોવા મળ્યો હતો. સ્થાનિક લોકોએ નસીબ જાગ્યું કહીને રાહતનો શ્વાસ લીધો કે ટ્રકના આ બેકાબૂ કૃત્યમાં કોઈ જાનહાનિ થઈ નથી. પોલીસ અકસ્માતની વધુ તપાસ હાથ ધરી છે.

---------------

હિન્દુસ્થાન સમાચાર / Gondaliya Abhishek Nandrambhai