ગૌહાટી, નવી દિલ્હી, 01 જૂન (હિ.સ.). છેલ્લા બે દિવસથી ભારે વરસાદને કારણે, ઉત્તરપૂર્વ ભારતમાં ભયંકર પૂર અને ભૂસ્ખલન થયું છે. આસામ, મણિપુર, અરુણાચલ પ્રદેશ અને મિઝોરમમાં અત્યાર સુધીમાં 20 થી વધુ લોકોનાં મોત થયા છે. ભારતીય હવામાન વિભાગે આ ભારે વરસાદને બાંગ્લાદેશ પર બનેલા નીચા દબાણને આભારી ગણાવ્યો છે.

ગૌહાટીના ચપાઈડાંગમાં ભૂસ્ખલનને કારણે એક મહિલા અને બાળકો સહિત ત્રણ લોકોના મોત થયા છે. અરુણાચલ પ્રદેશમાં ભૂસ્ખલનને કારણે ઓછામાં ઓછા નવ લોકોના મોત થયા છે. પૂર્વ કામેંગ જિલ્લામાં બાના-ચેપ્પા હાઇવે પર એક વાહન ખાડામાં પડી જવાથી બે પરિવારના સાત સભ્યોના મોત થયા છે.

લોઅર સુબનસિરી જિલ્લા નજીક ભૂસ્ખલનમાં બે લોકોના મોતની માહિતી પણ પ્રકાશમાં આવી છે. પશ્ચિમ કામેંગમાં બાલીપારા-ચરદુવાર-તવાંગ રોડ પર ભૂસ્ખલનથી અનેક ગામોનો સંપર્ક બંધ થઈ ગયો છે, જેના કારણે ઘણા પ્રવાસીઓ ફસાયા છે.

મણિપુરમાં અચાનક પૂર અને ભૂસ્ખલનથી સેનાપતિ, તામેંગલોંગ, નુને અને ફેરજોલ જેવા પહાડી જિલ્લાઓમાં ભારે વિનાશ સર્જાયો છે. ઇમ્ફાલ નદીનો બંધ તૂટવાથી ઇમ્ફાલ પૂર્વનો મોટો ભાગ પાણીમાં ડૂબી ગયો છે. રાજ્ય વહીવટીતંત્રે જણાવ્યું હતું કે, ઇમ્ફાલ પૂર્વ અને પશ્ચિમ જિલ્લાઓમાંથી મહિલાઓ, બાળકો, વૃદ્ધો અને અન્ય લોકો સહિત ઓછામાં ઓછા 800 લોકોને સ્થળાંતરિત કરવામાં આવ્યા છે.

ભારતીય સેના અને આસામ રાઇફલ્સે, શનિવારે 'ઓપરેશન જલરાહત' હેઠળ મણિપુરના પૂરગ્રસ્ત વિસ્તારોમાંથી લગભગ 800 નાગરિકોને બચાવ્યા હતા. શનિવારે વરસાદને કારણે ઇમ્ફાલમાં ભારે પાણી ભરાઈ ગયા હતા, જેના કારણે રસ્તાઓ પર વાહનવ્યવહાર ઠપ્પ થઈ ગયો હતો અને સામાન્ય જનજીવન પર ખરાબ અસર પડી હતી. શહેર અને તેની આસપાસના નીચાણવાળા વિસ્તારો સૌથી વધુ પ્રભાવિત થયા હતા.

મિઝોરમમાં પણ પરિસ્થિતિ અલગ નહોતી. વિનાશક પૂરને કારણે છેલ્લા 24 કલાકમાં ચાર લોકોના મોત થયા છે. જિલ્લા આપત્તિ વ્યવસ્થાપન સત્તામંડળના જણાવ્યા અનુસાર, ચમ્ફાઇ જિલ્લામાં અચાનક પૂરમાં એક જ પરિવારના ત્રણ સભ્યોના મોત થયા છે, જ્યારે સેરછીપમાં એક વ્યક્તિનું મોત થયું છે. ભૂસ્ખલનથી ઘણા જિલ્લાઓમાં ઘરો અને રસ્તાઓને નુકસાન થયું છે. સમાચાર લખાઈ રહ્યા છે ત્યારે, એક વ્યક્તિ કાટમાળ નીચે દટાયેલો હોવાના અહેવાલ છે.

મિઝોરમના ગવર્નર જનરલ વીકે સિંહ અને આપત્તિ વ્યવસ્થાપન મંત્રી પ્રોફેસર લાલનીલાવમાએ અસરગ્રસ્ત વિસ્તારોની મુલાકાત લીધી હતી અને મૃતકોના પરિવારજનો માટે 4 લાખ રૂપિયાના વળતરની જાહેરાત કરી હતી. રાજ્યભરમાં રાહત અને દેખરેખ કામગીરી ચાલી રહી છે.

હિન્દુસ્થાન સમાચાર / શ્રીપ્રકાશ / સુનિત નિગમ

હિન્દુસ્થાન સમાચાર / માધવી વ્યાસ