નારાયણપુર/રાયપુર, નવી દિલ્હી, 26 જૂન (હિ.સ.). નારાયણપુર જિલ્લાના અબુજમાડ કોહકામેટા પોલીસ સ્ટેશન વિસ્તારના ગાઢ જંગલોમાં સુરક્ષા દળો અને નક્સલીઓ વચ્ચે ભીષણ અથડામણ થઈ છે. બુધવાર રાતથી ગુરુવાર સવાર સુધી સુરક્ષા દળો અને નક્સલીઓ વચ્ચે થયેલા અથડામણમાં બે મહિલા નક્સલીઓ માર્યા ગયા છે. ઘટનાસ્થળેથી મહિલા નક્સલીઓના મૃતદેહ, એક ઇન્સાસ રાઇફલ, એક .315 બોરનું હથિયાર, મેડિકલ કીટ અને અન્ય વસ્તુઓ મળી આવી છે. પોલીસ અધિક્ષક પ્રભાત કુમારે આ વાતની પુષ્ટિ કરી છે.
નારાયણપુર પોલીસના જણાવ્યા અનુસાર, માડ ડિવિઝનના સક્રિય માઓવાદી કેડરોની હાજરીની માહિતી મળ્યા બાદ, ડીઆરજી (જિલ્લા રિઝર્વ ગાર્ડ) નારાયણપુર, કોંડાગાંવ અને એસટીએફ (સ્પેશિયલ ટાસ્ક ફોર્સ) ની સંયુક્ત ટીમે બુધવારે સાંજથી આ વિસ્તારમાં સર્ચ ઓપરેશન શરૂ કર્યું હતું. ગુરુવાર સવાર સુધી ચાલેલા આ એન્કાઉન્ટરમાં સુરક્ષા દળોએ બે મહિલા નક્સલીઓને ઠાર કરી છે. પોલીસે જણાવ્યું હતું કે, માર્યા ગયેલા મહિલા નક્સલીઓની ઓળખ કરવામાં આવી રહી છે. સર્ચ ઓપરેશન હજુ પણ ચાલુ છે.
હિન્દુસ્થાન સમાચાર / કેશવ કેદારનાથ શર્મા / વીરેન્દ્ર સિંહ
હિન્દુસ્થાન સમાચાર / ડો.હિતેશ એન.વ્યાસ
