ગંગટોક, નવી દિલ્હી, 05 જૂન (હિ.સ.). ભારે વરસાદને કારણે ભૂસ્ખલન અને ટ્રાફિક અવરોધ બાદ ઉત્તર સિક્કિમમાં ફસાયેલા પ્રવાસીઓને બચાવવાની કામગીરી ગુરુવારે સવારે ફરી શરૂ થઈ. ભારતીય વાયુસેનાના હેલિકોપ્ટરની મદદથી, 63 લોકોને બે જૂથોમાં સુરક્ષિત રીતે પાક્યોંગ એરપોર્ટ પર લાવવામાં આવ્યા.

ભારતીય વાયુસેનાના હેલિકોપ્ટરો, આજે સવારે પાક્યોંગ ગ્રીનફિલ્ડ એરપોર્ટથી ઉત્તર સિક્કિમના છટેન માટે પ્રતિકૂળ હવામાન અને પડકારજનક ભૂપ્રદેશને કારણે ઉત્તર સિક્કિમના વિવિધ ભાગોમાં ફસાયેલા પ્રવાસીઓને બચાવવા માટે ઉડાન ભરી હતી. બે એમઆઈ-17 હેલિકોપ્ટરોએ તેમનું પ્રથમ બચાવ કાર્ય સફળતાપૂર્વક પૂર્ણ કર્યું અને છટેનથી પાક્યોંગ ગ્રીનફિલ્ડ એરપોર્ટ પર કુલ 39 લોકોને એરલિફ્ટ કર્યા. તેવી જ રીતે, ચિત્તા હેલિકોપ્ટરે ચાર લોકોને સુરક્ષિત રીતે બચાવ્યા. તે જ સમયે, એક એમઆઈ-17 હેલિકોપ્ટરે બે વિદેશી નાગરિકો સહિત 20 પ્રવાસીઓને સુરક્ષિત રીતે પાક્યોંગ એરપોર્ટ પર પહોંચાડ્યા.

રાજ્ય સરકારે, બચાવેલા પ્રવાસીઓને તેમના ગંતવ્ય સ્થાન સુધી પહોંચવામાં મદદ કરવા માટે, સિક્કિમ રાષ્ટ્રીયકૃત પરિવહન (એસએનટી) બસોની વ્યવસ્થા કરી છે. પ્રવાસીઓને ગંગટોક અને સિલિગુડી (પશ્ચિમ બંગાળ) લઈ જવા માટે બસોની વ્યવસ્થા કરવામાં આવી છે.

આ ઉપરાંત, બાગડોગરા (પશ્ચિમ બંગાળ) ની મુસાફરી કરવા માંગતા પ્રવાસીઓ માટે, એક અલગ એમઆઈ-17 હેલિકોપ્ટર ફ્લાઇટની વ્યવસ્થા કરવામાં આવી છે. રાજ્યના માહિતી અને જનસંપર્ક વિભાગે જણાવ્યું હતું કે, રાજ્ય સરકાર પ્રતિકૂળ હવામાન દરમિયાન પ્રવાસીઓની સલામતીને સર્વોચ્ચ પ્રાથમિકતા આપી રહી છે.

હિન્દુસ્થાન સમાચાર / બિશાલ ગુરુંગ / વીરેન્દ્ર સિંહ

હિન્દુસ્થાન સમાચાર / માધવી વ્યાસ