ભુજ - કચ્છ, 12 જુલાઈ (હિ.સ.) : કચ્છ જિલ્લાની પશુપાલકોની સૌથી મોટી સહકારી સંસ્થા “સરહદ ડેરી” ની કલગીમાં વધુ એક નવું સોપાન ઉમેરાયું છે જેમાં દૂધ સંઘના ચાંદરાણી સ્થિત દૂધ પ્રોસેસિંગ અને પેકેજીંગ પ્લાન્ટ ખાતે બે નવી પ્રોડક્ટ અમૂલ ‘કેસર પિસ્તા’ ફ્લેવર અને ‘રાજભોગ’ ફ્લેવર મટકા કુલફી આઈસ્ક્રીમ નુ ઉત્પાદન શરૂ કરવામાં આવ્યું છે. જેનું લોંચિંગ અમૂલ ફેડરેશનના વાઇસ ચેરમેન અને સરહદ ડેરીના ચેરમેન વલમજી હુંબલ દ્વારા કરવામાં આવ્યું છે.

સહકારી સંસ્થા અને પશુપાલકો માટે ગૌરવની વાત

લોંચિંગ બાબતે વલમજીભાઈએ જણાવ્યુ હતું કે સરહદ ડેરી દ્વારા હમેશા દૂધ કલેક્શનથી લઈ અને વેચાણ સુધીની શૃંખલાને મજબૂત કરવાનું પ્રાધાન્ય આપવામાં આવ્યું છે જે અંતર્ગત ઉત્તરોતર નવીન પ્રોડક્ટનું પ્લાન્ટ ખાતે ઉત્પાદન કરી અને વેચાણ કરવામાં આવે છે. જેમાં અમૂલ ની નવી પ્રોડક્ટ મટકા કુલફી આઈસ્ક્રીમનું ઉત્પાદન જે અમૂલ મારફત સરહદ ડેરી દ્વારા આખા ભારતભરમાં પ્રથમ છે. જે સરહદ ડેરી સાથે જોડાયેલ પશુપાલકો માટે આ ગર્વ ની વાત છે.

સમગ્ર ગુજરાતના પાર્લરમાં વેંચાણ થશે

અમૂલ મટકા કુલ્ફી આઈસ્ક્રીમ સમગ્ર ગુજરાત સહિત કચ્છ જિલ્લાની બજારમાં તેમજ અમૂલ પાર્લર પર વેચાણ માટે ઉપલબ્ધ થશે. અને જન્માષ્ટમીના પાવન પર્વ પર આ પ્રોડક્ટ લોકોને ભેટ સ્વરૂપે આપી શકાય તે માટેની પેકિંગ માં લોંચિંગ કરવામાં આવ્યું છે. અમૂલ કેસર પિસ્તા ફ્લેવર અને રાજભોગ ફ્લેવર મટકા કુલફી આઈસ્ક્રીમ 70 રૂપિયા પ્રતિ 100 ગ્રામ ના સિરામિક પેકમાં આજથી બજારમાં વેચાણ અર્થે ઉપલબ્ધ થશે.

મહાનુભાવોની વિશેષ ઉપસ્થિતિમાં લોંચિંગ થયું

આ પ્રસંગે રાષ્ટ્રીય સ્વયંસેવક સંઘ- RSSમાંથી હર્ષભાઈ પરમાર અને મોહનભાઈ માતા, સરહદ ડેરી જનરલ મેનેજર નિરવભાઈ ગુસાઈ તેમજ આઇસક્રીમ પ્લાન્ટ મેનેજર અભિષેક છાવરી, પ્લાન્ટ મેનેજર બિશ્વજીત બેનર્જી તથા દૂધ પ્લાન્ટના અધિકારીઓ અને કર્મચારીઓ હાજર રહ્યા હતા.

હિન્દુસ્થાન સમાચાર / BHAVIN K VORA