નવી દિલ્હી, 31 જુલાઈ (હિ.સ.). કેન્દ્ર સરકાર રાષ્ટ્રીય સહકારી વિકાસ નિગમ (એનસીડીસી) ને એક યોજના હેઠળ નાણાકીય સહાય પૂરી પાડશે. એનસીડીસી ને 2025-26 થી 2028-29 ના સમયગાળા માટે કુલ 2 હજાર કરોડ રૂપિયાની ગ્રાન્ટ આપવામાં આવશે. આ સાથે એનસીડીસી, આગામી ચાર વર્ષમાં ખુલ્લા બજારમાંથી 20 હજાર કરોડ રૂપિયા સુધીનું ભંડોળ એકત્ર કરી શકશે. આ ભંડોળનો ઉપયોગ સહકારી મંડળીઓને લોન આપવા માટે કરવામાં આવશે.

પ્રધાનમંત્રી નરેન્દ્ર મોદીની અધ્યક્ષતામાં ગુરુવારે યોજાયેલી મંત્રીમંડળની બેઠકમાં, 2025-26 થી 2028-29 સુધીના 4 વર્ષના સમયગાળા માટે 2 હજાર કરોડ રૂપિયાના ખર્ચ સાથે કેન્દ્રીય ક્ષેત્ર યોજના 'રાષ્ટ્રીય સહકારી વિકાસ નિગમને ગ્રાન્ટ સહાય' ને મંજૂરી આપવામાં આવી હતી.

કેન્દ્રીય માહિતી અને પ્રસારણ મંત્રી અશ્વિની વૈષ્ણવે રાષ્ટ્રીય મીડિયા સેન્ટર ખાતે એક પત્રકાર પરિષદમાં મંત્રીમંડળના નિર્ણયોની માહિતી આપી. તેમણે કહ્યું કે, 13,288 સહકારી મંડળીઓના લગભગ 2.9 કરોડ સભ્યોને આ યોજનાનો સીધો લાભ મળવાની શક્યતા છે. આ સહકારી મંડળીઓમાં ડેરી, પશુપાલન, મત્સ્યઉદ્યોગ, ખાંડ, કાપડ, ખાદ્ય પ્રક્રિયા, સંગ્રહ, કોલ્ડ સ્ટોરેજ, કામદારો અને મહિલા સંચાલિત સહકારી મંડળીઓનો સમાવેશ થાય છે.

હિન્દુસ્થાન સમાચાર / અનૂપ શર્મા / પવન કુમાર

હિન્દુસ્થાન સમાચાર / ડો.હિતેશ એન.વ્યાસ