નવી દિલ્હી, 5 જાન્યુઆરી (હિ.સ.) - ઉપરાષ્ટ્રપતિ સી.પી. રાધાકૃષ્ણને સોમવારે અહીં જણાવ્યું હતું કે, ઓપરેશન સિંદૂર દરમિયાન નેશનલ કેડેટ કોર્પ્સ (એનસીસી) એ પ્રશંસનીય ભૂમિકા ભજવી હતી. ઉપરાષ્ટ્રપતિએ, દિલ્હી કેન્ટોનમેન્ટ વિસ્તારમાં આયોજિત એનસીસી પ્રજાસત્તાક દિવસ શિબિર 2026 ને સંબોધતા આ નિવેદન આપ્યું હતું. એનસીસી પ્રજાસત્તાક દિવસ શિબિર 28 જાન્યુઆરીએ પ્રધાનમંત્રીની રેલી સાથે સમાપ્ત થશે. આ મહિના સુધી ચાલનારા શિબિરમાં 898 છોકરીઓ સહિત દેશભરના 2,406 એનસીસી કેડેટ્સ ભાગ લઈ રહ્યા છે.

ઉપરાષ્ટ્રપતિએ કહ્યું કે, ગયા વર્ષે ઓપરેશન સિંદૂર દ્વારા, ભારતીય સશસ્ત્ર દળોએ દેશને ગૌરવ અપાવ્યું હતું અને વિશ્વ સમક્ષ ભારતના સંકલ્પનું પ્રદર્શન કર્યું હતું. તેમણે આ કામગીરી દરમિયાન એનસીસી ના યોગદાનની પ્રશંસા કરી હતી, નોંધ્યું હતું કે, આશરે 72,000 એનસીસી કેડેટ્સે નાગરિક સંરક્ષણ ફરજો માટે સ્વૈચ્છિક સેવા આપી હતી, કટોકટીના સમયે રાષ્ટ્રની સેવા કરવા માટે તેમની પ્રતિબદ્ધતા, હિંમત અને તત્પરતા દર્શાવી હતી.

ઉલ્લેખનીય છે કે, ભારતીય સશસ્ત્ર દળો દ્વારા 7 મે, 2025 ના રોજ ઓપરેશન સિંદૂર હાથ ધરવામાં આવ્યું હતું, જેમાં પહેલગામ આતંકવાદી હુમલામાં 26 નિર્દોષ નાગરિકોની હત્યાના જવાબમાં ઓછામાં ઓછા 100 આતંકવાદીઓ માર્યા ગયા હતા.

કેડેટ્સને નવા વર્ષની શુભકામનાઓ આપતા, ઉપરાષ્ટ્રપતિએ કહ્યું કે એનસીસી, જે હવે તેના 78મા વર્ષમાં છે, તે વિશ્વનું સૌથી મોટું ગણવેશધારી યુવા સંગઠન છે, જે શિસ્તબદ્ધ, જવાબદાર અને દેશભક્ત નાગરિકો બનાવવાના તેના ઉદ્દેશ્યને અવિરતપણે અનુસરે છે.

એનસીસી ના એકતા અને શિસ્ત ના સૂત્રનો ઉલ્લેખ કરતા, ઉપરાષ્ટ્રપતિએ કહ્યું કે આ સંગઠન આત્મવિશ્વાસ અને મૂલ્યો આધારિત યુવાનોને પ્રોત્સાહન આપી રહ્યું છે, જે 2047 માં વિકસિત ભારતનો પાયો છે. પ્રજાસત્તાક દિવસના મહત્વને સમજાવતા, ઉપરાષ્ટ્રપતિએ કહ્યું કે, એનસીસી પ્રજાસત્તાક દિવસ શિબિર ન્યાય, સ્વતંત્રતા, સમાનતા અને બંધુત્વના બંધારણીય મૂલ્યોને મૂર્તિમંત કરે છે, જ્યાં વિવિધ રાજ્યો અને કેન્દ્રશાસિત પ્રદેશોના કેડેટ્સ સાથે તાલીમ લે છે અને રાષ્ટ્રીય એકતાની ભાવનાને મજબૂત બનાવે છે. તેમણે સાહસિક પ્રવૃત્તિઓ, આંતરરાષ્ટ્રીય યુવા વિનિમય કાર્યક્રમો, પર્યાવરણીય અભિયાનો અને આપત્તિ રાહત કામગીરીમાં એનસીસી કેડેટ્સની ભૂમિકાની પણ પ્રશંસા કરી - ખાસ કરીને કેરળના વાયનાડમાં આવેલા પૂર દરમિયાન.

એનસીસી તાલીમના આધુનિકીકરણ, સાયબર અને ડ્રોન તાલીમની રજૂઆત અને રિમોટ પાયલટ તાલીમ એકેડેમીની સ્થાપનાનું સ્વાગત કરતાં, ઉપરાષ્ટ્રપતિએ કહ્યું કે, આ પહેલ યુવાનોને ભવિષ્યના તકનીકી અને સુરક્ષા પડકારો માટે તૈયાર કરશે. તેમણે એનસીસી અધિકારીઓ, પ્રશિક્ષકો અને સ્ટાફના સમર્પણની પણ પ્રશંસા કરી.

અગાઉ, શિબિરમાં પહોંચ્યા પછી, ઉપરાષ્ટ્રપતિએ એનસીસી કેડેટ્સ દ્વારા રજૂ કરાયેલ ગાર્ડ ઓફ ઓનરનું નિરીક્ષણ કર્યું. તેમણે હોલ ઓફ ફેમ ની મુલાકાત લીધી, વિવિધ પ્રદર્શની સ્ટોલ જોયા અને કેડેટ્સ દ્વારા રજૂ કરાયેલ સાંસ્કૃતિક કાર્યક્રમ જોયો. આ કાર્યક્રમમાં એનસીસી ડિરેક્ટર જનરલ લેફ્ટનન્ટ જનરલ વીરેન્દ્ર વત્સ, વરિષ્ઠ અધિકારીઓ, પ્રશિક્ષકો અને દેશના વિવિધ ભાગોના કેડેટ્સ હાજર રહ્યા.

હિન્દુસ્થાન સમાચાર / સુશીલ કુમાર / પવન કુમાર

હિન્દુસ્થાન સમાચાર / માધવી વ્યાસ