કોલકતા, નવી દિલ્હી, 9 જાન્યુઆરી (હિ.સ.): પશ્ચિમ બંગાળના રાજ્યપાલ સી.વી. આનંદ બોસને ઇમેઇલ દ્વારા બોમ્બથી ધમકી મળ્યા બાદ, ગુરુવારે રાત્રે રાજભવન (લોકભવન) ખાતે સુરક્ષા વધારી દેવામાં આવી હતી.

રાજભવનના સૂત્રોના જણાવ્યા અનુસાર, ધમકીભર્યા ઇમેઇલમાં એક મોબાઇલ નંબરનો પણ ઉલ્લેખ કરવામાં આવ્યો હતો. ધમકીની ગંભીરતાને ધ્યાનમાં રાખીને, પોલીસ મહાનિર્દેશકને જાણ કરવામાં આવી છે, તેમને મોબાઇલ નંબરની સત્યતા ચકાસવા અને શંકાસ્પદ વ્યક્તિની તાત્કાલિક ધરપકડ કરવા વિનંતી કરવામાં આવી છે. કેન્દ્રીય ગૃહ મંત્રાલય અને મુખ્યમંત્રી મમતા બેનર્જીને પણ જાણ કરવામાં આવી છે.

હાલમાં, રાજ્યપાલ બોસ માટે ઝેડ-પ્લસ સુરક્ષા છે, તેમની સુરક્ષા માટે લગભગ 70 કેન્દ્રીય સુરક્ષા કર્મચારીઓ તૈનાત છે. ધમકી બાદ, રાજ્ય પોલીસ અને સીઆરપીએફ એ સંયુક્ત રીતે સુરક્ષા વ્યવસ્થાની સમીક્ષા શરૂ કરી છે. રાજભવન સંકુલની અંદર દેખરેખ વધારી દેવામાં આવી છે, અને પ્રવેશ અને બહાર નીકળવાના સ્થળો પર વધારાની તકેદારી રાખવામાં આવી રહી છે.

રાજભવનના એક અધિકારીએ જણાવ્યું હતું કે, ગુરુવારે મધ્યરાત્રિએ સુરક્ષા એજન્સીઓની એક ખાસ બેઠક યોજાઈ હતી, જેમાં રાજભવનની સુરક્ષા અને રાજ્યપાલની આગામી મુલાકાતો દરમિયાન વધારાના સુરક્ષા પગલાં અંગે ચર્ચા કરવામાં આવી હતી.

ભાજપના નેતા અમિત માલવિય એ, સોશિયલ મીડિયા પર રાજ્ય સરકાર પર નિશાન સાધતા કહ્યું કે, પશ્ચિમ બંગાળમાં કાયદો અને વ્યવસ્થા સંપૂર્ણપણે પડી ભાંગી છે. તેમણે પ્રશ્ન કર્યો કે જો રાજ્યપાલ પોતે સુરક્ષિત નથી, તો સામાન્ય નાગરિકોની સુરક્ષાની સ્થિતિ શું હશે?

આ ધમકી એવા સમયે આવી છે જ્યારે કોલકાતામાં રાજકીય વ્યૂહરચનાકાર કંપની આઈ-પેક ના કાર્યાલયો પર એન્ફોર્સમેન્ટ ડિરેક્ટોરેટના દરોડાને કારણે રાજકીય વાતાવરણ ગરમાયું છે. મુખ્યમંત્રી મમતા બેનર્જીએ આ દરોડા માટે કેન્દ્ર સરકારને જવાબદાર ઠેરવી છે અને આજે વિરોધ પ્રદર્શનનું આહ્વાન કર્યું છે.

હિન્દુસ્થાન સમાચાર / ઓમ પરાશર / મુકુન્દ

હિન્દુસ્થાન સમાચાર / માધવી વ્યાસ