- ઉત્તમ કાયદો વ્યવસ્થાના કારણે ગુજરાત દેશના ગ્રોથ એન્જિન તરીકે પ્રસ્થાપિત થયું છે તેમાં પોલીસ દળની ફરજ નિષ્ઠાનું મોટું યોગદાન છે: ભૂપેન્દ્ર પટેલ

અમદાવાદ,21 ઓકટોબર (હિ.સ.) મુખ્યમંત્રી ભૂપેન્દ્ર પટેલે પ્રજાની સુરક્ષા, સલામતી અને કાયદો- વ્યવસ્થાની જાળવણી માટે ફરજ દરમિયાન સર્વોચ્ચ બલિદાન આપનારા વીર શહીદ પોલીસકર્મીઓને પોલીસ શહીદ સ્મૃતિ દિવસ નિમિત્તે ભાવપૂર્ણ શ્રદ્ધાંજલિ અર્પણ કરી હતી. પોલીસ જવાનોની અવિરત ફરજ નિષ્ઠા અને ઉત્તમ કાયદો-વ્યવસ્થાને કારણે ગુજરાત દેશના ગ્રોથ એન્જિન તરીકે પ્રસ્થાપિત થયું છે તેમ મુખ્યમંત્રીએ આ તકે જણાવ્યું હતું.

દેશના નાગરિકોની સુરક્ષા માટે પોતાના પ્રાણની આહુતિ આપનારા પોલીસકર્મીઓના શૌર્ય, સમર્પણ અને બલિદાનને યાદ કરવા દર વર્ષે 21 ઓક્ટોબરે સમગ્ર દેશમાં પોલીસ શહીદ સ્મૃતિ દિવસ મનાવવામાં આવે છે.

અમદાવાદમાં યોજાયેલા આ પોલીસ શહીદ સ્મૃતિ દિવસમાં રાજ્યના શહીદ પોલીસકર્મીઓની નામાવલીનું પઠન કરવા અને પોલીસ દળ દ્વારા તેમને શિસ્તબદ્ધ સન્માન સલામી આપવામાં આવી ત્યારે પોલીસ બેન્ડ દ્વારા શોક ધૂન રજૂ કરવામાં આવી હતી.

મુખ્યમંત્રીએ જણાવ્યું હતું કે વડાપ્રધાન નરેન્દ્ર મોદીએ સરકારના વડા તરીકેના પોતાના સેવાકાળ દરમિયાન પોલીસ દળના યોગદાનને સન્માનિત કરવા અનેક મહત્વપૂર્ણ પગલાં લીધાં છે. દિલ્હીમાં રાષ્ટ્રીય પોલીસ સ્મારકનું નિર્માણ અને પોલીસ મ્યુઝિયમની શરૂઆત એ પોલીસકર્મીઓના બલિદાનને સન્માન આપવાની સાથે નવી પેઢીને પોલીસ દળની ભૂમિકા અને મહત્ત્વથી પરિચિત કરાવવાનો પ્રશંસનીય પ્રયાસ છે.

ગુજરાતમાં તાજેતરમાં નવરાત્રિ પર્વ શાંતિપૂર્ણ રીતે સંપન્ન થયું તે બદલ મુખ્યમંત્રીએ પોલીસ દળની કર્તવ્ય પરાયણતાને અભિનંદન પાઠવતાં કહ્યું કે, રાજ્યના વિકાસ અને પ્રગતિ માટે સુરક્ષિત વાતાવરણ અનિવાર્ય છે. રાજ્યમાં શાંતિ, સલામતી અને સુદૃઢ કાયદો-વ્યવસ્થા જાળવવામાં પોલીસ દળની ભૂમિકા અત્યંત મહત્ત્વપૂર્ણ છે.

ગુજરાતના પોલીસ અધિકારીઓ અને કર્મચારીઓની કર્તવ્યપરાયણતાને બિરદાવતાં તેમણે વીર શહીદ પોલીસકર્મીઓ પ્રત્યે પણ કૃતજ્ઞતા વ્યક્ત કરી હતી.

અમદાવાદના શાહીબાગ શહીદ સ્મારક ખાતે યોજાયેલ આ કાર્યક્રમમાં સાંસદ દિનેશ મકવાણા, ધારાસભ્યો સર્વ ડૉ. હસમુખ પટેલ, કૌશિક જૈન, અમૂલ ભટ્ટ, દિનેશસિંહ કુશવાહ, કંચન રાદડિયા સહિત નિવૃત્ત વરિષ્ઠ પોલીસ અધિકારીઓએ પણ શહીદ સ્મારક ખાતે પુષ્પાંજલિ અર્પણ કરી શહીદોને નમન કર્યું હતું.

રાજ્યના પોલીસ વડા જી.એસ.મલિક, ડીજી (જેલ) ડૉ.કે.એલ.એન.રાવ, પોલીસ મહાનિદેશક (તાલીમ) નિરજા ગોટરું, અમદાવાદ પોલીસ કમિશનર અનુપમસિંહ ગેહલોત, અધિક પોલીસ મહાનિદેશક ખુર્શીદ અહેમદ સહિતના ઉચ્ચ પોલીસ અધિકારીઓ-કર્મીઓ ઉપસ્થિત રહ્યા હતા.

હિન્દુસ્થાન સમાચાર / હર્ષ શાહ