સુરત, 16 ફેબ્રુઆરી (હિ.સ.) : સુરતમાં ભાગીદારની કારમાં ડ્રગ્સ મૂકી ફસાવવાનો અને મારામારી કરીને લોકોમાં ભયનો માહોલ ઉભો કરનાર કુખ્યાત ચિરાગ ગોટીને લઈને આજે શહેરમાં ભારે તણાવપૂર્ણ સ્થિતિ સર્જાઈ હતી. સુરત શહેર SOG પોલીસ રિકન્સ્ટ્રક્શન માટે આરોપીને ઘટનાસ્થળે લઈ ગઈ ત્યારે મોટી સંખ્યામાં લોકો રસ્તા પર એકત્ર થયા હતા અને આરોપી વિરુદ્ધ ભારે આક્રોશ વ્યક્ત કર્યો હતો. પરિસ્થિતિ એટલી બગડી ગઈ કે ધક્કામુક્કી સર્જાતા પોલીસે મહામહેનતે ચિરાગ ગોટીને સુરક્ષિત રીતે ત્યાંથી બહાર કાઢ્યો હતો.

સ્થાનિક લોકો આરોપીની માથાભારે પ્રવૃત્તિઓથી લાંબા સમયથી પરેશાન હતા. વિરોધ સ્વરૂપે કેટલાક લોકોએ ઢોલ-નગારા સાથે પ્રદર્શન કર્યું અને આરોપીને કડક સજા, અહીં સુધી કે ફાંસીની સજા આપવાની માંગ પણ ઉઠાવી. સામાન્ય રીતે આવા પ્રસંગે ભયનો માહોલ જોવા મળે છે, પરંતુ અહીં લોકોના ગુસ્સા સામે ચિરાગ ગોટી હાથ જોડીને માફી માંગતો નજરે પડ્યો હતો.

ગુર્જર ક્ષત્રિય કડીયા સમાજના આગેવાનોએ પણ આરોપી વિરુદ્ધ કડક કાર્યવાહી કરવાની માંગ કરી હતી. તેમણે સ્પષ્ટ કર્યું કે આરોપીના વ્યક્તિગત ગુનાઓ સાથે સમાજનો કોઈ સંબંધ નથી અને ગુનાહિત પ્રવૃત્તિ કરનાર વ્યક્તિની કોઈ જાતિ હોતી નથી. કાયદો નિષ્પક્ષ રીતે કામ કરે અને ન્યાયની પ્રક્રિયામાં સામાજિક અથવા રાજકીય દબાણ ન આવવું જોઈએ તેવી માંગ પણ કરવામાં આવી.

પોલીસ તપાસ દરમિયાન ચિરાગ ગોટીના પિતા ઘનશ્યામની પણ ધરપકડ કરવામાં આવી છે. તપાસમાં સામે આવ્યું છે કે ચિરાગ ગોટી પોતાની દહેશત જમાવવા માટે નિર્દોષ લોકોને વિવિધ રીતે ફસાવી તેમને મારપીટ કરતો અને તેના વીડિયો બનાવી સોશિયલ મીડિયા પર વાયરલ કરતો હતો જેથી કોઈ તેના વિરુદ્ધ અવાજ ઉઠાવે નહીં.

આ સમગ્ર મામલો આશરે 10 મહિના જૂનો છે. સિંગણપોર પોલીસે વાહન ચેકિંગ દરમિયાન ઓઈલ વેપારી અલ્પેશ મિયાણીની 7.87 લાખ રૂપિયાના ડ્રગ્સ સાથે ધરપકડ કરી હતી. ત્યારબાદની તપાસમાં ખુલ્યું કે ભાગીદાર સાથેના વિવાદ બાદ ચિરાગ ગોટીએ અદાવત રાખીને અલ્પેશ મિયાણીની કારમાં ડ્રગ્સ મૂક્યા હતા અને પોલીસને બાતમી આપીને તેને ફસાવ્યો હતો. આગળની તપાસમાં ચિરાગ ગોટીની આ શાતિર ચાલ સામે આવી હતી.

ફરિયાદ નોંધાયા બાદ ચિરાગ ગોટી પોલીસથી બચવા સતત સ્થળ બદલતો રહ્યો હતો અને નેપાળ ભાગી જઈ વિવિધ હોટલોમાં રોકાયો હતો. બાદમાં તેણે સુરત કોર્ટમાં સરેન્ડર કર્યું હતું. હાલ તેની સામે પૈસા પડાવવાના, ધમકીઓ આપવાના સહિત 6થી વધુ ગુનાઓ નોંધાયેલા છે અને પોલીસે વધુ તપાસ શરૂ કરી છે.

---------------

હિન્દુસ્થાન સમાચાર / યજુવેન્દ્ર દુબે