માર્કપુરમ, નવી દિલ્હી, 26 માર્ચ (હિ.સ.). ગુરુવારે સવારે આંધ્રપ્રદેશના માર્કાપુરમ જિલ્લામાં રાયાવરમ નજીક એક હાઇ સ્પીડ ટિપર ટ્રક એક ખાનગી બસ સાથે અથડાઈ, જેના કારણે બંને વાહનો વચ્ચે ભીષણ આગ લાગી ગઈ. 14 મુસાફરોના મોત અને 23 ઘાયલ થયા.

માર્કપુરમના પોલીસ અધિક્ષક (એસપી) વી. હર્ષવર્ધન રાજુએ જણાવ્યું હતું કે, અકસ્માતમાં 14 લોકોના મોત થયા છે, અને ડ્રાઇવર સહિત 23 ઘાયલોને હોસ્પિટલમાં દાખલ કરવામાં આવ્યા છે.

પોલીસ પાસેથી મળેલી પ્રાથમિક માહિતી અનુસાર, સવારે 6:00 થી 6:30 વાગ્યાની વચ્ચે રાયાવરમ ગામ નજીક આ અકસ્માત થયો હતો. હરિકૃષ્ણ ટ્રાવેલ્સની માલિકીની ખાનગી બસ તેલંગાણાના નિર્મલથી આંધ્રપ્રદેશના નેલ્લોર જઈ રહી હતી.

માર્કપુરમના એક વરિષ્ઠ પોલીસ અધિકારીએ જણાવ્યું હતું કે, બસ વળાંક લઈ રહી હતી ત્યારે અકસ્માત થયો હતો. તે જ સમયે, વિરુદ્ધ દિશામાંથી આવતી એક ઝડપી ટિપર ટ્રક તેની સાથે અથડાઈ હતી. ટક્કર એટલી ગંભીર હતી કે, બંને વાહનોમાં તરત જ આગ લાગી ગઈ, જેના કારણે મુસાફરો બહાર નીકળી શક્યા નહીં.

અકસ્માત સમયે બસમાં આશરે 40 મુસાફરો હતા. બસની આગળના ભાગમાં આશરે 10 મુસાફરો ભાગી જવામાં સફળ રહ્યા, પરંતુ પાછળના લોકો આગમાં ફસાઈ ગયા.

આંધ્રપ્રદેશના મુખ્યમંત્રી એન. ચંદ્રબાબુ નાયડુએ, આ ઘટના પર ઊંડો દુ:ખ વ્યક્ત કર્યો. મુખ્યમંત્રી કાર્યાલય દ્વારા જારી કરાયેલા નિવેદન મુજબ, મુખ્યમંત્રીએ વરિષ્ઠ અધિકારીઓ સાથે વાત કરી અને પરિસ્થિતિની સમીક્ષા કરી. તેમણે ઘાયલોને શ્રેષ્ઠ શક્ય તબીબી સહાય પૂરી પાડવાના નિર્દેશ આપ્યા છે.

સ્થાનિક ધારાસભ્ય કંદુલા નારાયણ રેડ્ડીએ પણ ઘટનાસ્થળની મુલાકાત લીધી અને રાહત કામગીરીની સમીક્ષા કરી. પોલીસ હજુ પણ મૃતકોની ઓળખ કરવા અને અકસ્માતના ચોક્કસ કારણની તપાસ કરવા માટે કામ કરી રહી છે.

હિન્દુસ્થાન સમાચાર/વીરેન્દ્ર સિંહ

હિન્દુસ્થાન સમાચાર / ડો.હિતેશ એન.વ્યાસ