છોટાઉદેપુર, 22 જૂન (હિ.સ.) : છોટાઉદેપુર જિલ્લાના રાજવાસણા ગામે ગુજરાતનો પ્રથમ અને અનોખો રબર ડેમ તૈયાર થવાની કગાર પર છે. હેરણ નદી પર નિર્માણ પામેલા આ આધુનિક ડેમથી વિસ્તારના આશરે 20 ગામોને પાણીની સમસ્યામાં રાહત મળશે. બોડેલી સિંચાઈ વિભાગની દેખરેખ હેઠળ તૈયાર થઈ રહેલા આ પ્રોજેક્ટમાં આધુનિક ટેકનોલોજીનો ઉપયોગ કરવામાં આવ્યો છે. ડેમની બોડી વોલ પર દક્ષિણ કોરિયાથી મંગાવવામાં આવેલા રબર બ્લેડર (Rubber Bladder) લગાવવામાં આવ્યા છે. કુલ 180 મીટર લંબાઈના ત્રણ સ્પાનમાં આ રબર બ્લેડર સ્થાપિત કરવામાં આવ્યા છે.

વિશેષતા એ છે કે આ રબર બ્લેડરમાં માત્ર 20 મિનિટમાં હવા ભરી શકાય છે અને જરૂર પડે ત્યારે 10 મિનિટમાં હવા કાઢી પણ શકાય છે. ચોમાસા દરમિયાન નદીમાં વધુ પાણીનો પ્રવાહ હોય ત્યારે ડેમની ઊંચાઈ ઓછી કરી શકાય છે, જ્યારે પાણી સંગ્રહની જરૂરિયાત મુજબ ફરી હવા ભરી ઊંચાઈ વધારી શકાય છે.

હેરણ નદી કવાંટ, પાવી જેતપુર, બોડેલી અને સંખેડા તાલુકાઓમાંથી પસાર થઈ નર્મદા નદીમાં મળે છે. અત્યાર સુધી નદીનું મોટાભાગનું પાણી વહી જતું હતું, પરંતુ આ રબર ડેમના કારણે પાણીનો સંગ્રહ શક્ય બનશે અને ખેડૂતો તેમજ ગ્રામજનોને મોટો લાભ મળશે. આ પ્રોજેક્ટ પૂર્ણ થયા બાદ આવનારા ચોમાસામાં પ્રથમ વખત હેરણ નદીનું પાણી રોકી શકાશે. સિંચાઈ, પીવાનું પાણી અને ભૂગર્ભ જળસ્તર વધારવા માટે આ ડેમ મહત્વપૂર્ણ સાબિત થશે.

બોડેલી સિંચાઈ વિભાગના અધિકારીઓના જણાવ્યા મુજબ આ ડેમ માત્ર ગુજરાત માટે જ નહીં પરંતુ સમગ્ર રાજ્યમાં આધુનિક જળસંચય વ્યવસ્થાનું એક મોડેલ પ્રોજેક્ટ બની રહેશે. 20થી વધુ ગામોના ખેડૂતો અને સ્થાનિક રહેવાસીઓ માટે આ ડેમ આશીર્વાદરૂપ સાબિત થવાની આશા વ્યક્ત કરવામાં આવી છે.

---------------

હિન્દુસ્થાન સમાચાર / અમિત શાહ