ભાવનગર, 10 ઓગસ્ટ (હિ.સ.) મહુવા તાલુકાના તલગાજરડા ખાતે આવેલી મોડેલ સ્કૂલમાં વિશ્વ સિંહ દિવસની ઉજવણી નિમિત્તે વિવિધ કાર્યક્રમોનું આયોજન કરવામાં આવ્યું હતું. કાર્યક્રમનો મુખ્ય હેતુ વિદ્યાર્થીઓમાં સિંહ સહિતના વન્યજીવોના સંરક્ષણ, પર્યાવરણ જાળવણી અને કુદરતી વારસાના રક્ષણ અંગે જાગૃતિ ફેલાવવાનો હતો.

કાર્યક્રમમાં મહુવાના ધારાસભ્ય શિવા ગોહિલ, વન વિભાગના અધિકારીઓ, શાળાના શિક્ષકો અને વિદ્યાર્થીઓ ઉપસ્થિત રહ્યા હતા. ઉપસ્થિત મહાનુભાવોએ વિદ્યાર્થીઓને સિંહના મહત્વ તથા ગુજરાતની ધરતી સાથે જોડાયેલા તેના ગૌરવપૂર્ણ વારસા અંગે માહિતી આપી હતી.

કાર્યક્રમ દરમિયાન સિંહ અને અન્ય વન્યજીવોના સંરક્ષણ માટે સામૂહિક જવાબદારીની જરૂરિયાત પર ભાર મૂકવામાં આવ્યો હતો. વન્યજીવોનું અસ્તિત્વ જળવાઈ રહે તે માટે જંગલોનું સંરક્ષણ, વૃક્ષારોપણ, પર્યાવરણની જાળવણી અને કુદરતી સંસાધનોનો યોગ્ય ઉપયોગ જરૂરી હોવાનું જણાવાયું હતું.

વિદ્યાર્થીઓને વન્યજીવો પ્રત્યે પ્રેમ અને સંવેદનશીલતા કેળવવા તેમજ પ્રકૃતિના સંરક્ષણમાં પોતાની ભૂમિકા નિભાવવા પ્રેરિત કરવામાં આવ્યા હતા. સિંહ માત્ર વન્યજીવ નથી, પરંતુ ગુજરાતની ઓળખ અને ગૌરવ સાથે જોડાયેલો કુદરતી વારસો છે. એશિયાટિક સિંહનું એકમાત્ર કુદરતી નિવાસસ્થાન ગુજરાતના ગીર વિસ્તારમાં આવેલું હોવાથી તેના સંરક્ષણની જવાબદારી વધુ મહત્વપૂર્ણ બને છે.

વિશ્વ સિંહ દિવસ નિમિત્તે યોજાયેલા કાર્યક્રમ દ્વારા વિદ્યાર્થીઓ અને ઉપસ્થિત સૌમાં સિંહ સંરક્ષણ તથા પર્યાવરણ જાળવણી અંગે જાગૃતિનો સંદેશ આપવામાં આવ્યો હતો. સિંહ અને અન્ય વન્યજીવોનું સંરક્ષણ કરી કુદરતી વારસાને આગામી પેઢી સુધી જાળવી રાખવાનો સંકલ્પ વ્યક્ત કરવામાં આવ્યો હતો.

હિન્દુસ્થાન સમાચાર / DISHANT NANDRAMBHAI GONADLIYA