હોંગકોંગ, નવી દિલ્હી, 7 નવેમ્બર (હિ.સ.). શુક્રવારે ટીન ક્વોંગ રોડ રિક્રિએશન ગ્રાઉન્ડ ખાતે રમાયેલી હોંગકોંગ સિક્સેસ 2025 મેચમાં ભારતે પાકિસ્તાનને 2 રનથી હરાવ્યું. વરસાદથી વિક્ષેપિત આ પૂલ સી મેચનું પરિણામ ડકવર્થ-લુઇસ (ડીએલએસ) પદ્ધતિનો ઉપયોગ કરીને નક્કી કરવામાં આવ્યું. દિવસની અંતિમ મેચ, ઓસ્ટ્રેલિયા વિરુદ્ધ ઇંગ્લેન્ડ, વરસાદને કારણે રદ કરવામાં આવી હતી.

વરસાદને કારણે મેચ ટૂંકી કરવામાં આવી હતી, પરંતુ ભારતીય ટીમે દબાણ હેઠળ શાનદાર પ્રદર્શન કર્યું હતું. પ્રથમ બેટિંગ કરતા, ભારતે 6 ઓવરમાં 4 વિકેટે 86 રન બનાવ્યા. રોબિન ઉથપ્પાએ માત્ર 11 બોલમાં 28 રનની ઝડપી ઇનિંગ રમી, જ્યારે ભરત ચિપલીએ 13 બોલમાં 24 રન ઉમેર્યા. કેપ્ટન દિનેશ કાર્તિકે આખરે 6 બોલમાં અણનમ 17 રનની ઇનિંગ રમીને ટીમને સ્પર્ધાત્મક સ્કોર સુધી પહોંચાડી.

જવાબમાં, પાકિસ્તાને ઝડપી શરૂઆત કરી, ત્રણ ઓવરમાં 1 વિકેટે 41 રન બનાવ્યા, પરંતુ વરસાદે મેચ અટકાવી દીધી. રમત ફરી શરૂ થઈ શકી નહીં, અને ડીએલએસ ગણતરી મુજબ પાકિસ્તાન લક્ષ્યથી 2 રન દૂર રહ્યું. ભારત માટે સ્ટુઅર્ટ બિન્નીએ શાનદાર બોલિંગ કરી, માત્ર 7 રનમાં 1 વિકેટ લીધી, જે આખરે નિર્ણાયક સાબિત થઈ.

અન્ય મેચો:

પૂલ બી : ઓસ્ટ્રેલિયાએ યુએઈ ને 10 વિકેટથી કચડી નાખ્યું. 88 રનના લક્ષ્યનો પીછો કરતા, ઓસ્ટ્રેલિયા માત્ર ત્રણ ઓવરમાં જીતી ગયું. જેક વુડે 11 બોલમાં 55 રનની વિસ્ફોટક ઇનિંગ રમી, જ્યારે નિક હોબસન 5 બોલમાં 26 રન બનાવી અણનમ રહ્યો.

પૂલ એ : અફઘાનિસ્તાને પોતાનું પ્રભાવશાળી પ્રદર્શન ચાલુ રાખ્યું, દક્ષિણ આફ્રિકાને 49 રનથી હરાવ્યું. કેપ્ટન ગુલબદ્દીન નાયબે 12 બોલમાં 50 રન બનાવ્યા, જ્યારે કરીમ જનાતે 11 બોલમાં 46 રન બનાવ્યા. અફઘાનિસ્તાને છ ઓવરમાં 148/2 નો વિશાળ કુલ સ્કોર બનાવ્યો. જવાબમાં, દક્ષિણ આફ્રિકા ફક્ત 99/2 જ બનાવી શક્યું.

પૂલ ડી : બાંગ્લાદેશે શ્રીલંકાને 14 રનથી હરાવીને જીત નોંધાવી. કેપ્ટન અકબર અલીએ 9 બોલમાં 32 રન બનાવ્યા, જ્યારે મોસાદ્દેક હુસૈને ત્રણ વિકેટ (3/20) લઈને શ્રીલંકાને 61/6 સુધી રોકી દીધુ. શ્રીલંકાની આ સતત બીજી હાર હતી.

હિન્દુસ્થાન સમાચાર / સુનીલ દુબે / સુનીત નિગમ

હિન્દુસ્થાન સમાચાર / માધવી વ્યાસ