અમ્માન, નવી દિલ્હી, 16 ડિસેમ્બર (હિ.સ.). ભારતના પ્રધાનમંત્રી નરેન્દ્ર મોદી અને જોર્ડનના રાજા અબ્દુલ્લા દ્વિતીય ઇબ્ન અલ-હુસૈન, આજે અહીં ભારત-જોર્ડન વ્યાપાર સમિટને સંબોધિત કરશે. આ સમિટમાં બંને દેશોના અગ્રણી ઉદ્યોગપતિઓ હાજરી આપશે. હવામાન અનુકૂળ રહેશે તો, પ્રધાનમંત્રી મોદી, જોર્ડનના ક્રાઉન પ્રિન્સ સાથે પેત્રા શહેરની પણ મુલાકાત લેશે. પેત્રા એક ઐતિહાસિક શહેર છે જે ભારત સાથે પ્રાચીન વેપાર સંબંધો ધરાવે છે. પ્રધાનમંત્રી મોદી, અબ્દુલ્લા દ્વિતીયના આમંત્રણ પર ગઈકાલે બે દિવસીય મુલાકાતે જોર્ડન પહોંચ્યા હતા. રાજાએ હુસૈનિયા પેલેસ ખાતે મોદીનું ઉષ્માભર્યું સ્વાગત કર્યું હતું, જ્યાં પ્રતિનિધિમંડળ-સ્તરની વાટાઘાટો પહેલા બંનેએ સામ-સામે મુલાકાત કરી હતી.

દિલ્હી અમ્માનનું ત્રીજું સૌથી મોટું વેપારી ભાગીદાર છે. ભારત અને જોર્ડન મજબૂત આર્થિક સંબંધો ધરાવે છે, જેનો કુલ વેપાર 2.8 અબજ અમેરિકન ડોલર છે. જોર્ડન ભારતમાં ખાતરો, ખાસ કરીને ફોસ્ફેટ અને પોટાશનો મુખ્ય સપ્લાયર પણ છે. જોર્ડનમાં 17,500 થી વધુ ભારતીય પ્રવાસીઓ રહે છે. તેમાંથી મોટાભાગના કાપડ, બાંધકામ અને ઉત્પાદન જેવા ક્ષેત્રોમાં કાર્યરત છે.

પ્રધાનમંત્રી મોદીની ચાર દિવસની ત્રણ દેશોની મુલાકાતમાં જોર્ડન પહેલું રોકાણ છે. તેમની મુલાકાત પૂર્ણ કર્યા પછી, તેઓ ઇથોપિયા અને ઓમાનની પણ મુલાકાત લેશે. પ્રધાનમંત્રી નરેન્દ્ર મોદીએ એક્સ પર લખ્યું, અમ્માનમાં રાજા અબ્દુલ્લા દ્વિતીય સાથે ફળદાયી વાતચીત થઈ. જીવંત ભારત-જોર્ડન સંબંધો પ્રત્યેની તેમની વ્યક્તિગત પ્રતિબદ્ધતા પ્રશંસનીય છે. આ વર્ષે, અમે અમારા દ્વિપક્ષીય રાજદ્વારી સંબંધોની 75મી વર્ષગાંઠની ઉજવણી કરી રહ્યા છીએ. આ માઈલનો પથ્થર આપણને આવનારા સમયમાં નવી ઉર્જા સાથે આગળ વધવા માટે પ્રેરણા આપતું રહેશે.

તેમણે કહ્યું, જોર્ડન સાથે સંબંધોને વધુ ગાઢ બનાવવા માટે આઠ-પોઇન્ટ વિઝન દસ્તાવેજ શેર કર્યો. આમાં શામેલ છે: (1) વેપાર અને આર્થિક સહયોગ, (2) ખાતરો અને કૃષિ, (3) માહિતી ટેકનોલોજી, (4) આરોગ્યસંભાળ, (5) માળખાગત સુવિધા, (6) મહત્વપૂર્ણ અને વ્યૂહાત્મક ખનિજો, (7) નાગરિક પરમાણુ સહયોગ અને (8) લોકો-થી-લોકોના સંબંધો. સોમવારે અગાઉ, પ્રધાનમંત્રી મોદી અને જોર્ડનના રાજા દ્વિપક્ષીય સંબંધોની સમીક્ષા કરવા અને પરસ્પર મહત્વના પ્રાદેશિક અને વૈશ્વિક મુદ્દાઓ પર વિચારોનું આદાન-પ્રદાન કરવા માટે મળ્યા હતા.

પ્રધાનમંત્રી મોદીએ, રાજા અબ્દુલ્લા દ્વિતીયને કહ્યું, ેઅમે વેપાર, ખાતરો, ડિજિટલ ટેકનોલોજી, માળખાગત સુવિધાઓ અને લોકો વચ્ચેના સંપર્ક જેવા ક્ષેત્રોમાં અમારો સહયોગ ચાલુ રાખીશું. મોદીએ કહ્યું કે બંને દેશો આતંકવાદ સામે એક સમાન અને સ્પષ્ટ દ્રષ્ટિકોણ ધરાવે છે. પ્રધાનમંત્રીએ ગાઝા મુદ્દા પર રાજા અબ્દુલ્લા દ્વિતીયની સક્રિય અને સકારાત્મક ભૂમિકાની પ્રશંસા કરી. પ્રધાનમંત્રી નરેન્દ્ર મોદીએ કહ્યું, તમે ભારત-જોર્ડન સંબંધોને નવી ઊંચાઈઓ પર લઈ જવા માટે ખૂબ જ સકારાત્મક વિચારો શેર કર્યા. હું તમારી મિત્રતા અને ભારત પ્રત્યેની ઊંડી પ્રતિબદ્ધતા બદલ હૃદયપૂર્વક આભાર માનું છું.

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ