વડોદરા, 1 જૂન (હિ.સ.)-વડોદરા જિલ્લાના કોયલી ધનોરા રોડ સ્થિત ઔદ્યોગિક વિસ્તારમાં આવેલ પ્લાસ્ટિક ઉત્પાદન કરતી કંપનીમાં ટેન્ક ક્લિનિંગ દરમિયાન કરંટ લાગવાથી એક યુવાનનું દુઃખદ મૃત્યુ થયું છે. પોલીસે બનાવની નોંધ લઈ કાયદેસરની કાર્યવાહી શરૂ કરી છે.

મૃતકની ઓળખ ૨૬ વર્ષીય અજય રમેશભાઇ રાઠોડ તરીકે થઈ છે, જે વડોદરા શહેરના કારેલીબાગ વિસ્તારમાં ચેપી રોગ દવાખાના નજીક વેદ મંદિરની ચાલીમાં રહેતો હતો. અજય તેના ભાઇ સાગર સાથે ટેન્ક ક્લિનિંગના કામમાં સહભાગી હતો. સાગર ઈન્ડસ્ટ્રીયલ કંપનીઓમાં ટેન્ક સાફસફાઇના કોન્ટ્રાક્ટ લે છે અને અજય તેના સાથે કામ કરતો હતો.

શનિવાર બપોરે, બંને ભાઇ કોયલી ધનોરા રોડ પર આવેલી સેબિક ઇનોવેટિવ પ્લાસ્ટિક કંપનીમાં વોટર ટેન્ક સાફ કરવા ગયા હતા. ઘટનાની વિધિ અનુસાર, અજય ટેન્ક પર ચઢીને હાઈ પ્રેશર જેટ મશીન વડે સફાઈ કરી રહ્યો હતો ત્યારે મશીનના વાયરમાં તકલીફથી અચાનક કરંટ લાગ્યો. ગંભીર રીતે ઘાયલ અજયને તરત નજીકની ખાનગી હોસ્પિટલ ખસેડવામાં આવ્યો હતો, પરંતુ તબીબોએ તેને મૃત જાહેર કર્યો.

જવાહરનગર પોલીસ મથકે અકસ્માતમૃત્યુનો ગુનો નોંધી કાયદેસરની કાર્યવાહી શરૂ કરી છે. કંપનીની સુરક્ષા વ્યવસ્થાઓ અને મશીનરીની તપાસ હાથ ધરાશે તેવી પણ શક્યતા છે.

હિન્દુસ્થાન સમાચાર / યજુવેન્દ્ર દુબે