રાયપુર, નવી દિલ્હી, 18 જુલાઈ (હિ.સ.). એન્ફોર્સમેન્ટ ડિરેક્ટોરેટ (ઈડી) એ આજે સવારે છત્તીસગઢના ભિલાઈમાં પૂર્વ મુખ્યમંત્રી અને વરિષ્ઠ કોંગ્રેસ નેતા ભૂપેશ બઘેલ અને તેમના પુત્ર ચૈતન્ય બઘેલના પરિસરમાં દરોડા પાડ્યા છે. સવારે 6 વાગ્યે ઈડીના લગભગ 12 અધિકારીઓ બઘેલના નિવાસસ્થાને પહોંચ્યા. તેમની સાથે મોટી સંખ્યામાં સીઆરપીએફ કર્મચારીઓ પણ હાજર છે. સત્તાવાર સૂત્રો કહે છે કે, 2161 કરોડ રૂપિયાના દારૂ કૌભાંડના કેસમાં કાર્યવાહી કરવામાં આવી રહી છે.

ભૂપેશ બઘેલે ઇન્સ્ટાગ્રામ પર લખ્યું, ઈડી આવી ગયું છે. આજે વિધાનસભા સત્રનો છેલ્લો દિવસ છે. અદાણી માટે તમનારમાં વૃક્ષો કાપવાનો મુદ્દો આજે ઉઠાવવાનો હતો. સાહેબે ઈડી ને ભિલાઈના નિવાસસ્થાને મોકલી દીધી છે.'' કોંગ્રેસે દરોડાની પુષ્ટિ કરી છે અને તેની માહિતી તેના સત્તાવાર જૂથમાં શેર કરી છે. ઈડી ની ટીમ હજુ પણ ભિલાઈમાં બઘેલના નિવાસસ્થાને હાજર છે.

માર્ચ 2025 ની શરૂઆતમાં, ઈડી એ ભૂપેશ બઘેલના ઘરે દરોડા પાડ્યા હતા. ત્યારબાદ ઘરમાંથી રોકડ જપ્ત કર્યા પછી, એક નોટ ગણવાની મશીન પણ મંગાવવામાં આવી હતી. નોંધનીય છે કે છત્તીસગઢમાં દારૂ કૌભાંડની તપાસમાં ઈડી એ મોટો ખુલાસો કર્યો છે. તપાસમાં બહાર આવ્યું છે કે, રાજ્યમાં એક સંગઠિત દારૂ સિન્ડિકેટ કાર્યરત હતું. અનવર ઢેબર, અનિલ તુટેજા અને અન્ય ઘણા લોકો તેમાં સામેલ હતા. આ કૌભાંડમાંથી લગભગ 2161 કરોડ રૂપિયાની ગેરકાયદેસર કમાણી થઈ હતી. નોંધનીય છે કે આ કેસમાં પૂર્વ મંત્રી કવાસી લખમા જેલમાં છે.

ઈડી ના દરોડાની માહિતી મળતા જ કોંગ્રેસના કાર્યકરો ભિલાઈ-૩ માં બઘેલના નિવાસસ્થાન પર ભૂપેશ સુધી પહોંચવા લાગ્યા છે. ચરોડા મ્યુનિસિપલ કોર્પોરેશનના ચેરમેન કૃષ્ણ ચંદ્રકર કહે છે કે, ભૂતપૂર્વ મુખ્યમંત્રી ભૂપેશ બઘેલ દરેક જગ્યાએ જઈ રહ્યા છે અને કોંગ્રેસનું વર્ચસ્વ સ્થાપિત કરી રહ્યા છે. આનાથી ભાજપને ઘણું નુકસાન થઈ રહ્યું છે. વિધાનસભા સત્રમાં, કોંગ્રેસ સતત રાજ્ય સંબંધિત મુદ્દાઓ ઉઠાવી રહી છે. તેનાથી ડરીને, ભૂપેશ બઘેલને રોકવા માટે આ કાર્યવાહી કરવામાં આવી રહી છે.

હિન્દુસ્થાન સમાચાર / કેશવ કેદારનાથ શર્મા / મુકુંદ

હિન્દુસ્થાન સમાચાર / માધવી વ્યાસ