નવી દિલ્હી, 18 જુલાઈ (હિ.સ.) દક્ષિણ ફિલ્મો સાથે જોડાયેલ એક ખૂબ જ દુઃખદ સમાચાર સામે આવ્યા છે. તમિલ ફિલ્મ ઉદ્યોગના પ્રખ્યાત દિગ્દર્શક અને અભિનેતા વેલુ પ્રભાકરનનું 18 જુલાઈના રોજ અવસાન થયું. 68 વર્ષીય વેલુ પ્રભાકરન છેલ્લા કેટલાક સમયથી વય સંબંધિત રોગોથી પીડાતા હતા. તાજેતરમાં તેમને ચેન્નાઈની એક ખાનગી હોસ્પિટલમાં દાખલ કરવામાં આવ્યા હતા, જ્યાં તેમણે સારવાર દરમિયાન અંતિમ શ્વાસ લીધા. તેમના મૃત્યુના સમાચારથી ફિલ્મ ઉદ્યોગમાં શોકનું મોજું ફરી વળ્યું છે. વેલુ પ્રભાકરનને તેમની સ્પષ્ટવક્તા શૈલી અને સાહસિક ફિલ્મો માટે હંમેશા યાદ રાખવામાં આવશે.

વેલુ પ્રભાકરનના નિધનથી તમિલ સિનેમા જગતમાં શોકનું મોજું ફરી વળ્યું છે. ફિલ્મ જગત સાથે સંકળાયેલા ઘણા સેલિબ્રિટી અને ચાહકોએ તેમના નિધન પર ઊંડો શોક વ્યક્ત કર્યો છે. તેમના અંતિમ સંસ્કાર 20 જુલાઈના રોજ પોરુર સ્મશાનગૃહમાં કરવામાં આવશે. પ્રભાકરને સિનેમેટોગ્રાફર (કેમેરામેન) તરીકે પોતાની કારકિર્દીની શરૂઆત કરી હતી. બાદમાં તેઓ દિગ્દર્શન તરફ વળ્યા અને 1989ની ફિલ્મ 'નાલયા મણિથન'થી દિગ્દર્શક તરીકે પદાર્પણ કર્યું. પ્રભાકરને પોતાની કારકિર્દીમાં ઘણી લોકપ્રિય અને બોલ્ડ વિષયો પર ફિલ્મો બનાવી. તેઓ 'ગેંગ્સ ઓફ મદ્રાસ', 'કડાવર', 'પિજ્જા 3', 'રેડ', 'કધલ કઢાઈ' અને 'વેપન' જેવી ફિલ્મો માટે જાણીતા છે. તેમણે તમિલ સિનેમાને એક અલગ ઓળખ આપવામાં મહત્વપૂર્ણ ભૂમિકા ભજવી હતી. તેમની સર્જનાત્મકતા અને અલગ વિચારસરણી હંમેશા યાદ રહેશે.

વેલુ પ્રભાકરનના પહેલા લગ્ન અભિનેત્રી જયદેવી સાથે થયા હતા. જોકે, આ સંબંધ લાંબો સમય ટકી શક્યો નહીં અને બંને અલગ થઈ ગયા. આ પછી, 60 વર્ષની ઉંમરે, પ્રભાકરને અભિનેત્રી શર્લી દાસ સાથે બીજી વાર લગ્ન કર્યા. રસપ્રદ વાત એ છે કે, શર્લીએ પ્રભાકરનની ફિલ્મ 'કધલ કઢાઈ'માં પણ અભિનય કર્યો હતો. તેમના આ લગ્નની પણ ખૂબ ચર્ચા થઈ હતી. પ્રભાકરનનું અંગત જીવન પણ ખૂબ જ બોલ્ડ અને તેમની ફિલ્મોની જેમ અન્ય લોકોથી અલગ હતું.

હિન્દુસ્થાન સમાચાર / લોકેશ ચંદ્ર દુબે / સંજીવ પાશ

---------------

હિન્દુસ્થાન સમાચાર / માધવી વ્યાસ