કેનબેરા, નવી દિલ્હી, 30 જુલાઈ (હિ.સ.). ઓસ્ટ્રેલિયન સરકારે એક મોટો નિર્ણય લીધો છે અને 16 વર્ષથી ઓછી ઉંમરના બાળકો માટે પ્રતિબંધિત સોશિયલ મીડિયા પ્લેટફોર્મમાં યુટ્યુબનો સમાવેશ કરવાની જાહેરાત કરી છે. અગાઉ યુટ્યુબને આ નિયમમાંથી મુક્તિ આપવામાં આવી હતી, પરંતુ સરકારે હવે તેમાં ફેરફાર કર્યો છે. જોકે, યુટ્યુબ કિડ્સ આમાંથી મુક્ત રહેશે. નવો નિયમ 10 ડિસેમ્બરથી અમલમાં આવશે.

ઓસ્ટ્રેલિયન સરકારે તેના તાજેતરના આદેશમાં 16 વર્ષથી ઓછી ઉંમરના બાળકો માટે યુટ્યુબ પર પ્રતિબંધ મૂક્યો છે. ઓસ્ટ્રેલિયામાં, સોશિયલ મીડિયા પ્લેટફોર્મ ફેસબુક, ઇન્સ્ટાગ્રામ, ટિકટોક, સ્નેપચેટ અને એક્સનો ઉપયોગ 16 વર્ષથી ઓછી ઉંમરના બાળકો માટે પ્રતિબંધિત છે. યુટ્યુબ પણ આ યાદીમાં સામેલ છે. સરકારે આ અંગે માર્ગદર્શિકા જારી કરી છે અને કહ્યું છે કે, જો 16 વર્ષથી ઓછી ઉંમરના બાળકોનું યુટ્યુબ એકાઉન્ટ મળી આવે અથવા બાળકો કોઈપણ સોશિયલ મીડિયા એકાઉન્ટ પર સબ્સ્ક્રાઇબ કરે તો કાનૂની કાર્યવાહી કરવામાં આવશે. બાળકો યુટ્યુબ કિડ્સનો ઉપયોગ કરી શકે છે. યુટ્યુબ કિડ્સ પર અપલોડ કરાયેલ સામગ્રી બાળકો માટે સલામત છે. બાળકો તેમાં વિડિઓ અપલોડ કરી શકતા નથી.

ધ ગાર્ડિયનના અહેવાલ મુજબ, સંદેશાવ્યવહાર મંત્રી અનિકા વેલ્સે આ નિર્ણયની જાહેરાત કરી અને કહ્યું કે, યુટ્યુબ કિડ્સ આનાથી મુક્ત રહેશે. તેમણે આ નિર્ણયને ઈ-સેફ્ટી કમિશનરની સલાહને આભારી ગણાવ્યો અને કહ્યું કે સરકાર એ હકીકતને અવગણી શકે નહીં કે 10 માંથી ચાર ઓસ્ટ્રેલિયન બાળકોએ જણાવ્યું છે કે, તેમને યુટ્યુબના ઉપયોગથી સૌથી વધુ નુકસાન થયું છે. વેલ્સે કહ્યું કે, સરકાર સોશિયલ મીડિયા કંપનીઓથી ડરશે નહીં અને આ નીતિ માતાપિતાને પ્રાથમિકતા આપીને લાવવામાં આવી છે.

સરકારનું કહેવું છે કે, યુટ્યુબને પ્રતિબંધોની યાદીમાં સામેલ કરવાનો નિર્ણય બાળકોની ઓનલાઈન સલામતીને પ્રોત્સાહન આપવા માટે લેવામાં આવ્યો છે. તે અન્ય દેશો માટે પણ એક મોડેલ બની શકે છે. બાળકો માટે સોશિયલ મીડિયા પર પ્રતિબંધ સંબંધિત ઓસ્ટ્રેલિયાનો કાયદો, વિશ્વમાં આ પ્રકારનો પ્રથમ કાયદો છે.

ઉલ્લેખનીય છે કે, ગયા વર્ષે નવેમ્બરમાં ઓસ્ટ્રેલિયામાં સંસદ દ્વારા 16 વર્ષથી ઓછી ઉંમરના બાળકો માટે સોશિયલ મીડિયા પર પ્રતિબંધ મૂકવાનું બિલ પસાર કરવામાં આવ્યું હતું. ખાસ વાત એ છે કે, શાસક અને વિપક્ષ બંનેએ તેને ટેકો આપ્યો હતો. ઓસ્ટ્રેલિયા આ પ્રકારનું બિલ પસાર કરનાર વિશ્વનો પ્રથમ દેશ છે.

હિન્દુસ્થાન સમાચાર / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ