ઇસ્લામાબાદ, નવી દિલ્હી, 31 જુલાઈ (હિ.સ.) પાકિસ્તાનના બલુચિસ્તાન પ્રાંતમાં સ્વતંત્રતા સંગ્રામમાં સામેલ સશસ્ત્ર જૂથોના સંકલન સંગઠન બલુચ રાજી અજોઈ સંગાર (બીઆરએએસ) એ જમુરાન વિસ્તારમાં પાકિસ્તાનના લશ્કરી દળો અને તેમને લોજિસ્ટિક્સ સપ્લાય કરતા વાહનો પર હુમલો કરવાનો દાવો કર્યો છે. બીઆરએએસ પ્રવક્તા બલુચ ખાને સ્વીકાર્યું કે, આ હુમલો તેના લડવૈયાઓ દ્વારા કરવામાં આવ્યો હતો. લડવૈયાઓએ સુરક્ષા દળના અનેક કર્મચારીઓને મારી નાખ્યા.

બલુચિસ્તાન પોસ્ટ અનુસાર, બીઆરએએસ પ્રવક્તા બલુચ ખાને 30 જુલાઈના રોજ જારી કરાયેલા એક નિવેદનમાં આ દાવો કર્યો હતો. પ્રવક્તા ખાને જણાવ્યું હતું કે, 28 જુલાઈની રાત્રે, સંગઠનના લડવૈયાઓએ જમુરાનમાં નવાનો નજીક પાકિસ્તાન સેના માટે લોજિસ્ટિક્સ લઈ જતા વાહનોને રોક્યા હતા અને તેમને આગ લગાવી દીધી હતી અને ચેતવણી આપ્યા પછી ડ્રાઇવરોને છોડી દીધા હતા.

નિવેદનમાં કહેવામાં આવ્યું છે કે, બીઆરએએસ લડવૈયાઓ રાતોરાત આ વિસ્તારમાં રહ્યા અને 29 જુલાઈના રોજ બીજો હુમલો કર્યો. પાકિસ્તાન આર્મીના વાહનો અને મોટરસાયકલોના કાફલા પર રિમોટ-કંટ્રોલ્ડ ઇમ્પ્રુવાઇઝ્ડ વિસ્ફોટક ઉપકરણનો ઉપયોગ કરીને હુમલો કરવામાં આવ્યો હતો. ત્યારબાદ ઓટોમેટિક હથિયારોથી ગોળીબાર કરવામાં આવ્યો હતો. બીઆરએએસ એ દાવો કર્યો છે કે, આ હુમલામાં પાંચ સૈન્ય જવાનો માર્યા ગયા હતા અને ઘણા લોકો ઘાયલ થયા હતા.

બીઆરએએસ એ, જમુરાનના કેટલાક સ્થાનિક રહેવાસીઓ પર સૈન્યને મદદ કરવાનો આરોપ લગાવ્યો છે. જૂથે લોકોને ચેતવણી આપી છે કે, તેઓ આમ ન કરે, નહીં તો તેમને ગંભીર પરિણામો ભોગવવા પડશે. આ સમયગાળા દરમિયાન જાનમાલના નુકસાન માટે તે લોકો જવાબદાર રહેશે. નિવેદનમાં, બીઆરએએસ એ, બલુચિસ્તાનની મુક્તિ સુધી પાકિસ્તાન સેના અને તેના સાથીઓ સામે સશસ્ત્ર પ્રતિકાર ચાલુ રાખવાની પ્રતિબદ્ધતાનો પુનરોચ્ચાર કર્યો છે.

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ