રામબન, નવી દિલ્હી, 30 ઓગસ્ટ (હિ.સ.). જમ્મુ અને કાશ્મીરના રામબન જિલ્લાના રાજગઢ તાલુકામાં વાદળ ફાટવાથી ચાર લોકોના મોત થયા છે અને એક વ્યક્તિ ગુમ છે. એક પોલીસ અધિકારીએ જણાવ્યું હતું કે, બચાવ ટીમોએ અસરગ્રસ્ત વિસ્તારમાંથી ચાર મૃતદેહ બહાર કાઢ્યા છે અને ગુમ થયેલા વ્યક્તિને શોધવાના પ્રયાસો ચાલુ છે. વાદળ ફાટવાથી અચાનક પૂર આવ્યું, જેના કારણે વિસ્તારમાં વ્યાપક નુકસાન થયું અને સામાન્ય જનજીવન પ્રભાવિત થયું. એક વ્યક્તિ હજુ પણ ગુમ છે, અધિકારીએ જણાવ્યું હતું.

દરમિયાન, કેન્દ્રીય મંત્રી ડૉ. જીતેન્દ્ર સિંહે એક્સ પરની એક પોસ્ટમાં જણાવ્યું હતું કે, તેમણે રામબનના ડેપ્યુટી કમિશનર મોહમ્મદ અયાઝ ખાન સાથે ઘટના અંગે વાત કરી છે. તેમણે કહ્યું, રાજગઢ વિસ્તારમાં વાદળ ફાટવાથી ચાર લોકોના કમનસીબે મોત થયા છે. એક વ્યક્તિ હજુ પણ ગુમ છે અને શોધખોળ કામગીરી ચાલુ છે. સદનસીબે, કોઈને ઈજા થઈ નથી. બચાવ કામગીરી ચાલુ છે અને શક્ય તમામ સહાય પૂરી પાડવામાં આવી રહી છે. હું જિલ્લા વહીવટીતંત્ર સાથે સતત સંપર્કમાં છું.

મુખ્યમંત્રી ઉમર અબ્દુલ્લાએ પણ આ ઘટના પર દુઃખ વ્યક્ત કર્યું છે. તેમના કાર્યાલયે એક્સ પર એક પોસ્ટમાં જણાવ્યું હતું કે, મુખ્યમંત્રીએ રામબનના રાજગઢમાં ભૂસ્ખલનને કારણે થયેલા જાનમાલના નુકસાન પર ઊંડો શોક વ્યક્ત કર્યો છે. તેમણે વહીવટીતંત્રને તાત્કાલિક બચાવ અને રાહત કામગીરી શરૂ કરવાનો નિર્દેશ આપ્યો છે.

હિન્દુસ્થાન સમાચાર / બલવાન સિંહ / વીરેન્દ્ર સિંહ

હિન્દુસ્થાન સમાચાર / ડો.હિતેશ એન.વ્યાસ