નવી દિલ્હી, 2 સપ્ટેમ્બર (હિ.સ.). વડા પ્રધાન નરેન્દ્ર મોદીએ આજે ​​જણાવ્યું હતું કે, ભારત સેમિકન્ડક્ટર ઉત્પાદનના ક્ષેત્રમાં એક ફુલ સ્ટેક ડેવલપર રાષ્ટ્ર બનશે અને ડિઝાઇનથી ઉત્પાદન સુધીની દરેક પ્રક્રિયામાં આત્મનિર્ભરતા પ્રાપ્ત કરશે.

મંગળવારે નવી દિલ્હીના યશોભૂમિ ખાતે 'સેમિકોન ઇન્ડિયા 2025'નું ઉદ્ઘાટન કર્યા બાદ સમારોહને સંબોધતા વડા પ્રધાને કહ્યું કે, ભારત હવે સેમિકન્ડક્ટરના ક્ષેત્રમાં ફક્ત બેકએન્ડ કાર્ય સુધી મર્યાદિત રહેશે નહીં, પરંતુ ઝડપથી પૂર્ણ સ્ટેક રાષ્ટ્ર બનવા તરફ આગળ વધી રહ્યું છે. દેશ ડિઝાઇનથી ઉત્પાદન સુધીની સમગ્ર પ્રક્રિયા પોતે કરશે.

વડા પ્રધાને કહ્યું કે, આજે આખી દુનિયા ભારત પર વિશ્વાસ કરે છે અને ભારત સાથે મળીને સેમિકન્ડક્ટર ભવિષ્ય બનાવવા માટે તૈયાર છે. તેમણે કહ્યું કે ભારતની નીતિ સ્થિરતા અને તકનીકી ક્ષમતાએ દેશને એક મજબૂત ભાગીદાર બનાવ્યો છે.

મોદીએ કહ્યું કે, દેશમાં હવે કામ ઝડપથી થઈ રહ્યું છે. અમારું માનવું છે કે કાગળકામ જેટલું ઓછું હશે, તેટલું વહેલું વેફર કાર્ય શરૂ થઈ શકશે. સરકાર પ્રક્રિયાઓને સરળ બનાવીને ઉદ્યોગને નવી ઉર્જા આપવા માટે કામ કરી રહી છે. તેમણે વિશ્વાસ વ્યક્ત કર્યો કે તે દિવસ દૂર નથી જ્યારે દુનિયા કહેશે - ડિઝાઇન ઇન ઇન્ડિયા, મેડ ઇન ઇન્ડિયા, ટ્રસ્ટેડ બાય ધ વર્લ્ડ. (ભારતમાં ડિઝાઇન, ભારતમાં ઉત્પાદિત અને વિશ્વ દ્વારા વિશ્વસનીય).

તેલને 'બ્લેક ગોલ્ડ' કહેવાતી વિભાવનાનો ઉલ્લેખ કરતા પ્રધાનમંત્રીએ કહ્યું કે, આજે ચિપ્સ 'ડિજિટલ ડાયમંડ' બની ગઈ છે. તેમણે કહ્યું કે, હવે ભારતે આ ક્ષેત્રમાં અગ્રણી બનવાનો સંકલ્પ કર્યો છે.

આ પ્રસંગે, કેન્દ્રીય માહિતી ટેકનોલોજી અને ઇલેક્ટ્રોનિક્સ મંત્રી અશ્વિની વૈષ્ણવે, પ્રધાનમંત્રીને વિક્રમ 32-બીટ પ્રોસેસર અને ચાર ટેસ્ટ ચિપ્સ રજૂ કરી. તેમણે કહ્યું કે, આ ઈસરો સેમિકન્ડક્ટર લેબ દ્વારા વિકસિત પ્રથમ સંપૂર્ણપણે મેક-ઇન-ઇન્ડિયા માઇક્રોપ્રોસેસર છે. હાલમાં, પાંચ સેમિકન્ડક્ટર યુનિટનું ઉત્પાદન થઈ રહ્યું છે, જેમાંથી એકની પાયલોટ લાઇન પૂર્ણ થઈ ગઈ છે.

વૈષ્ણવે કહ્યું કે, વૈશ્વિક નીતિ અસ્થિરતા અને અનિશ્ચિતતાઓ વચ્ચે ભારત સ્થિરતા અને વૃદ્ધિના દીવાદાંડી તરીકે ઉભરી આવ્યું છે. તેમણે ઉદ્યોગોને ભારતમાં આવવા હાકલ કરી કારણ કે અહીંની નીતિઓ સ્થિર અને લાંબા ગાળાના રોકાણ માટે અનુકૂળ છે.

આ કાર્યક્રમમાં હાજર રહેલા દિલ્હીના મુખ્યમંત્રી રેખા ગુપ્તાએ જણાવ્યું હતું કે, સેમિકોન ઇન્ડિયા માત્ર એક ઘટના નથી પરંતુ ટેકનોલોજીકલ પુનર્રુંજીવન નું પ્રતીક છે.

ઉલ્લેખનીય છે કે, ઇન્ડિયા સેમિકન્ડક્ટર મિશન સાડા ત્રણ વર્ષ પહેલાં શરૂ થયું હતું અને આજે તે દેશને વૈશ્વિક સેમિકન્ડક્ટર હબ બનાવવા તરફ એક નિર્ણાયક પગલું સાબિત થઈ રહ્યું છે.

પ્રધાનમંત્રી મોદી, કાલે સવારે કોન્ફરન્સમાં સીઈઓ રાઉન્ડ ટેબલમાં પણ હાજરી આપશે. આ ત્રણ દિવસીય કોન્ફરન્સ 2 થી 4 સપ્ટેમ્બર સુધી ચાલશે. આ કાર્યક્રમનો ઉદ્દેશ્ય ભારતમાં મજબૂત અને ટકાઉ સેમિકન્ડક્ટર ઇકોસિસ્ટમને આગળ વધારવાનો છે. કોન્ફરન્સમાં 20 હજાર, 750 થી વધુ સહભાગીઓ ભાગ લઈ રહ્યા છે. અગાઉ પણ 2022માં બેંગલુરુ, 2023માં ગાંધીનગર અને 2024માં ગ્રેટર નોઇડામાં આવી કોન્ફરન્સનું આયોજન કરવામાં આવ્યું છે.

હિન્દુસ્થાન સમાચાર / અનુપ શર્મા / સચિન બુધૌલિયા

હિન્દુસ્થાન સમાચાર / માધવી વ્યાસ