નવી દિલ્હી, 3 સપ્ટેમ્બર (હિ.સ.). દવા અને ક્લિનિકલ સંશોધન ક્ષેત્રમાં નિયમનકારી પાલનને સરળ બનાવવા અને વ્યવસાય કરવાની સરળતાને પ્રોત્સાહન આપવાના ઉદ્દેશ્ય સાથે, કેન્દ્રીય આરોગ્ય મંત્રાલય નવા ડ્રગ્સ અને ક્લિનિકલ ટ્રાયલ નિયમો, 2019 માં સુધારો કરવા જઈ રહ્યું છે. પ્રસ્તાવિત સુધારાઓ 28 ઓગસ્ટ 2025 ના રોજ ભારતના ગેઝેટમાં પ્રકાશિત થયા હતા અને તેના પર જનતા પાસેથી સૂચનો માંગવામાં આવ્યા છે. આ સુધારાઓનો હેતુ પરીક્ષણ લાઇસન્સ અને જૈવઉપલબ્ધતા/જૈવસમાનતા (બીએ/બીઈ) અભ્યાસ સંબંધિત અરજીઓની પ્રક્રિયાને સરળ બનાવવાનો છે.

બુધવારે આરોગ્ય મંત્રાલય દ્વારા જાહેર કરાયેલી માહિતી અનુસાર, આ નવા નિયમોમાં, અરજદારોને હવે લાયસન્સની રાહ જોવાની જરૂર રહેશે નહીં (કેટલીક ઉચ્ચ-જોખમ શ્રેણીની દવાઓ સિવાય), પરંતુ ફક્ત સેન્ટ્રલ લાઇસન્સિંગ ઓથોરિટીને જાણ કરવાની રહેશે. ઉપરાંત, પરીક્ષણ લાઇસન્સ અરજીનો કુલ વૈધાનિક પ્રક્રિયા સમયગાળો 90 દિવસથી ઘટાડીને 45 દિવસ કરવામાં આવ્યો છે.

આ સાથે, જૈવઉપલબ્ધતા/જૈવસમાનતાની ચોક્કસ શ્રેણીઓ માટે હાલના લાઇસન્સની આવશ્યકતા નાબૂદ કરવામાં આવશે. આવા કિસ્સાઓમાં, ફક્ત માહિતી અથવા દસ્તાવેજો સબમિટ કરવાની પ્રક્રિયા અપનાવવામાં આવશે.

આ નિયમનકારી સુધારાઓથી હિસ્સેદારોને ઘણો ફાયદો થશે, કારણ કે અરજી પ્રક્રિયા અને સમયમર્યાદામાં નોંધપાત્ર ઘટાડો થશે. પ્રસ્તાવિત સુધારાઓથી લાઇસન્સ અરજીઓની સંખ્યામાં લગભગ 50 ટકાનો ઘટાડો થશે. આનાથી અભ્યાસ, પરીક્ષણ અને સંશોધન માટે દવાઓની તપાસ વહેલી શરૂ થશે અને દવા વિકાસ અને મંજૂરી પ્રક્રિયામાં વિલંબ ઓછો થશે.

વધુમાં, આ સુધારાઓ સેન્ટ્રલ ડ્રગ્સ સ્ટાન્ડર્ડ કંટ્રોલ ઓર્ગેનાઇઝેશનને તેના માનવ સંસાધનોની જમાવટને વધુ અસરકારક બનાવવા સક્ષમ બનાવશે, જેનાથી નિયમનકારી દેખરેખની કાર્યક્ષમતા અને અસરકારકતામાં વધારો થશે.

હિન્દુસ્થાન સમાચાર / વિજયાલક્ષ્મી / સંજીવ પાશ

હિન્દુસ્થાન સમાચાર / માધવી વ્યાસ