અમરેલી 3 સપ્ટેમ્બર (હિ.સ.)

મરીન પીપાવાવ પોલીસ સ્ટેશન વિસ્તારમાં રહેતા એક અરજદારશ્રીએ પોતાનો કિંમતી મોબાઇલ ફોન ગુમાવ્યાની ફરિયાદ નોંધાવી હતી. આજના યુગમાં મોબાઇલ માત્ર વાતચીતનું સાધન નથી, પરંતુ વ્યક્તિગત માહિતી, દસ્તાવેજો, બેન્કિંગ ડેટા તથા સોશિયલ મીડિયાની વિગતો સાથે જીવનનો મહત્વનો હિસ્સો બની ગયો છે. આવી સ્થિતિમાં મોબાઇલ ગુમાવવાથી અરજદાર મુશ્કેલીમાં મુકાયા હતા.

તેરા તુજકો અર્પણ કાર્યક્રમ અંતર્ગત પોલીસ વિભાગ દ્વારા નાગરિકોની ગુમ થયેલી ચીજો શોધી તેમને પરત આપવાની વિશેષ કામગીરી હાથ ધરવામાં આવે છે. આ જ શ્રેણીમાં મરીન પીપાવાવ પોલીસ ટીમે માનવ સંસાધન તથા ટેક્નિકલ સોર્સનો ઉપયોગ કરીને મોબાઇલ ફોનના લોકેશન તથા અન્ય તકનીકી માહિતી મેળવી તેને સફળતાપૂર્વક ટ્રેસ કર્યો. જરૂરી પ્રક્રિયા પૂર્ણ કર્યા બાદ મોબાઇલ ફોન અરજદારને સન્માનપૂર્વક પરત અપાયો.

આ કાર્ય દ્વારા પોલીસએ ફરી એકવાર સાબિત કર્યું છે કે લોકોની સમસ્યાઓ ઉકેલવામાં અને તેમની ગુમાવેલી વસ્તુઓ પરત આપવા તેઓ હંમેશા પ્રતિબદ્ધ છે. અરજદારે મોબાઇલ પાછો મળતાં પોલીસની કાર્યક્ષમતા અને જવાબદારીની પ્રશંસા કરી. આવા પ્રયાસો નાગરિકોમાં પોલીસ પ્રત્યે વિશ્વાસ વધારવામાં તેમજ જનહિતમાં સેવાના સંકલ્પને મજબૂત બનાવવા માટે મહત્વપૂર્ણ સાબિત થાય છે.

---------------

હિન્દુસ્થાન સમાચાર / Gondaliya Abhishek Nandrambhai