પટના, નવી દિલ્હી, 4 સપ્ટેમ્બર (હિ.સ.). રાજધાની પટનાના સિપારા-પુનપુન રોડ પર પરસા બજાર પોલીસ સ્ટેશન વિસ્તારમાં મંગળવારે મોડી રાત્રે થયેલા માર્ગ અકસ્માતમાં 5 વેપારીઓના મોત થયા. અકસ્માત એટલો ગંભીર હતો કે કારના ફુરચા બોલી ગયા.

મૃતકોમાં કુરજી ચશ્મા ગલીના રહેવાસી 50 વર્ષીય રાજેશ કુમાર, પટેલ નગરના રહેવાસી સંજય, 55 વર્ષીય કુમાર સિંહા, પટનાના રહેવાસી 38 વર્ષીય કમલ કિશોર, સમસ્તીપુરના રહેવાસી 35 વર્ષીય પ્રકાશ ચૌરસિયા (હાલમાં પટનામાં રહે છે) અને મુઝફ્ફરપુરના રહેવાસી 38 વર્ષીય સુનિલ કુમાર (હાલમાં પટનામાં રહે છે)નો સમાવેશ થાય છે.

રાજેશ કુમારના ભાઈએ જણાવ્યું છે કે, બધા લોકો કોઈ વ્યવસાયિક કામ માટે ફતુહા ગયા હતા અને રાત્રે બિહટા-સરમેરા રોડ થઈને પટના પરત ફરી રહ્યા હતા. રસ્તામાં આ ભયંકર અકસ્માત થયો. રાજેશ કુમાર પટનામાં એક પ્રતિષ્ઠિત કૃષિ એજન્સી ચલાવતો હતો અને તેનું નેટવર્ક આસપાસના જિલ્લાઓમાં ફેલાયેલું હતું. તે જ વિસ્તારમાં અન્ય વેપારીઓ પણ તેની સાથે વ્યવસાય કરતા હતા.

પારસા પોલીસ સ્ટેશનના ઇન્ચાર્જ મેનકા રાનીએ જણાવ્યું હતું કે, અકસ્માતની માહિતી મળતા જ પોલીસ ટીમ ઘટનાસ્થળે પહોંચી ગઈ હતી. બચાવ કામગીરી બાદ મૃતદેહોને બહાર કાઢીને પીએમસીએચ (પટના મેડિકલ કોલેજ અને હોસ્પિટલ) મોકલવામાં આવ્યા હતા. અકસ્માત પછી, મોબાઇલ પર એક ફોન આવ્યો, જેના દ્વારા પોલીસે રાજેશ કુમારના પરિવારને જાણ કરી. બાદમાં, પરિવારના અન્ય સભ્યોને પણ જાણ કરવામાં આવી.

પ્રારંભિક તપાસમાં જાણવા મળ્યું કે, ગ્રાન્ડ વિટારા કારની ગતિ ખૂબ જ વધારે હતી. ટ્રક કાં તો ધીમી ગતિએ ચાલી રહી હતી અથવા કદાચ બાજુમાં ઉભી હતી. કારની ગતિ અને ટક્કરની તીવ્રતા પરથી એવો અંદાજ લગાવવામાં આવી રહ્યો છે કે, ડ્રાઇવરને બ્રેક લગાવવાનો પણ સમય મળ્યો ન હતો. સ્થાનિક લોકોના મતે, પટના-ગયા-ડોભી ચાર લેન પર અગાઉ આવા ઘણા અકસ્માતો થયા છે. રાત્રે ટ્રકોનું રેન્ડમ પાર્કિંગ, રોડ સિગ્નલનો અભાવ અને હાઇ સ્પીડ વાહનો અહીં અકસ્માતોનું મુખ્ય કારણ રહ્યા છે.

પારસા બજાર પોલીસ સ્ટેશનના ઇન્ચાર્જે જણાવ્યું હતું કે, પ્રથમ દ્રષ્ટિએ એવું લાગે છે કે આ ઘટના આંખ મીંચવાથી બની હતી, કારણ કે બંને વાહનો રસ્તા પર આગળ વધી રહ્યા હતા, ત્યારબાદ કાર ટ્રકની અંદર ઘૂસી ગઈ. હાલમાં, નજીકમાં લગાવેલા સીસીટીવી ફૂટેજના આધારે તપાસ કર્યા પછી જ ઘટના કેવી રીતે બની તે સ્પષ્ટ થશે.

હિન્દુસ્થાન સમાચાર / ગોવિંદ ચૌધરી / સંજીવ પાશ

હિન્દુસ્થાન સમાચાર / માધવી વ્યાસ