નવી દિલ્હી, 6 સપ્ટેમ્બર (હિ.સ.) ભારતે અમેરિકાના રાષ્ટ્રપતિ ડોનાલ્ડ ટ્રમ્પ દ્વારા કડવાશ દૂર કરવાના પ્રયાસોનો સકારાત્મક પ્રતિસાદ આપ્યો છે અને કહ્યું છે કે, તે અમેરિકા સાથેની તેની ભાગીદારીને ખૂબ મહત્વ આપે છે.

વિદેશ મંત્રી ડૉ. એસ. જયશંકરે શનિવારે અહીં જણાવ્યું હતું કે, ભારત અમેરિકા સાથેની તેની મિત્રતાને ખૂબ મહત્વ આપે છે. અમે અમેરિકા સાથે વાતચીત ચાલુ રાખી રહ્યા છીએ.

અમેરિકાના રાષ્ટ્રપતિ ડોનાલ્ડ ટ્રમ્પ દ્વારા ભારત પર લાદવામાં આવેલા ટેરિફને કારણે, તાજેતરના સમયમાં બંને દેશો વચ્ચેના સંબંધોમાં થોડું અંતર જોવા મળ્યું છે.

વિદેશ મંત્રીએ કહ્યું કે, વડા પ્રધાન મોદી અમેરિકા સાથેની અમારી ભાગીદારીને ખૂબ મહત્વ આપે છે. રાષ્ટ્રપતિ ટ્રમ્પ સાથે તેમના હંમેશા ખૂબ સારા વ્યક્તિગત સંબંધો રહ્યા છે, પરંતુ મુદ્દો એ છે કે અમે અમેરિકા સાથે વાતચીત ચાલુ રાખી રહ્યા છીએ અને આ સમયે તેઓ આનાથી વધુ કંઈ કહી શકતા નથી.

ઉલ્લેખનીય છે કે, વ્હાઇટ હાઉસ ખાતે ભારત-અમેરિકા સંબંધો પર એક નિવેદનમાં, અમેરિકી પ્રમુખ ટ્રમ્પે વડા પ્રધાન મોદીના વ્યક્તિત્વની પ્રશંસા કરી હતી અને તેમની સાથે મિત્રતા જાળવવાની વાત કરી હતી. તેમણે કહ્યું હતું કે, ભારત અને અમેરિકા વચ્ચે ખાસ સંબંધ છે. આમાં ચિંતા કરવાની કોઈ વાત નથી.

હિન્દુસ્થાન સમાચાર / અનૂપ શર્મા

હિન્દુસ્થાન સમાચાર / ડો.હિતેશ એન.વ્યાસ