નવી દિલ્હી, 01 ઓક્ટોબર (હિ.સ.). અર્થતંત્રના મોરચે સારા સમાચાર છે. દેશનો વસ્તુ અને સેવા કર (જીએસટી) મહેસૂલ સંગ્રહ સપ્ટેમ્બરમાં 14.7 ટકા વધીને 2.03 લાખ કરોડ રૂપિયા રહ્યો, જે સપ્ટેમ્બર 2025માં 1.77 લાખ કરોડ રૂપિયા રહ્યો હતો.

જીએસટી મહાનિર્દેશાલયે ગુરુવારે જાહેર કરાયેલા આંકડાઓમાં જણાવ્યું કે, ઘરેલું પ્રવૃત્તિઓમાંથી કુલ જીએસટી મહેસૂલ સંગ્રહ પણ 10.1 ટકા વધીને લગભગ 1.38 લાખ કરોડ રૂપિયા રહ્યો, જ્યારે આયાતમાંથી પ્રાપ્ત મહેસૂલ 26 ટકા વધીને 65,525 કરોડ રૂપિયા થઈ ગયું.

આંકડાઓ અનુસાર, કુલ જીએસટી મહેસૂલ સંગ્રહ સપ્ટેમ્બરમાં 2,03,521 કરોડ રૂપિયા રહ્યો, જે એક વર્ષ પહેલાં આ જ મહિનામાં 1,77,365 કરોડ રૂપિયા હતો. જોકે સપ્ટેમ્બરમાં વસ્તુ અને સેવા કર (જીએસટી) 'પરત ચૂકવણી' ત્રણ ટકા ઘટીને 27,001 કરોડ રૂપિયા રહી. 'પરત ચૂકવણી' સમાયોજિત કર્યા પછી સપ્ટેમ્બરમાં ચોખ્ખો જીએસટી મહેસૂલ સંગ્રહ 18.1 ટકા વધીને 1.76 લાખ કરોડ રૂપિયાથી વધુ થઈ ગયો, જે એક વર્ષ પહેલાં આ જ સમયગાળામાં 1.49 લાખ કરોડ રૂપિયા રહ્યો હતો.

જીએસટી મહાનિર્દેશાલય અનુસાર ચાલુ નાણાકીય વર્ષ 2026-27ના પ્રથમ છ મહિના (એપ્રિલ-સપ્ટેમ્બર)માં કુલ જીએસટી મહેસૂલ સંગ્રહ 11.6 ટકા વધીને 12.46 લાખ કરોડ રૂપિયા રહ્યો. આ જ રીતે ચોખ્ખો જીએસટી મહેસૂલ સંગ્રહ પણ 10.4 ટકા વધીને 10.66 લાખ કરોડ રૂપિયા રહ્યો.

હિન્દુસ્થાન સમાચાર / પ્રજેશ શંકર / સુનીત નિગમ

હિન્દુસ્થાન સમાચાર / માધવી વ્યાસ