નવી દિલ્હી, 01 ઓક્ટોબર (હિ.સ.). જાહેર ક્ષેત્રની તેલ અને ગેસ વિપણન કંપનીઓએ તહેવારોની સિઝન પહેલાં જેટ ફ્યુઅલની કિંમતોમાં વધારો કર્યો છે. કંપનીઓએ વિમાન ઇંધણ એટલે કે એવિએશન ટર્બાઇન ફ્યુઅલ (એટીએફ)ની કિંમતોમાં 13.22 ટકાનો વધારો કર્યો છે. એટીએફની કિંમતમાં સતત ત્રીજા મહિને વધારો કરવામાં આવ્યો છે, અને આ નવા દરો આજ ગુરુવારથી લાગુ થઈ ગયા છે.

ઇન્ડિયન ઓઇલની વેબસાઇટ મુજબ, વિમાન ઇંધણની કિંમતમાં આશરે 16 રૂપિયા પ્રતિ લિટરનો વધારો કરવામાં આવ્યો છે, જે 121 રૂપિયા પ્રતિ લિટરથી વધીને હવે 137 રૂપિયા પ્રતિ લિટર થઈ ગઈ છે. એટીએફની કિંમતમાં વધારા પછી, દિલ્હીમાં ઘરેલુ એરલાઇન્સ માટે વિમાન ઇંધણની કિંમત લગભગ 1,37,000 રૂપિયા પ્રતિ કિલોલિટર (137 રૂપિયા પ્રતિ લિટર) છે.

તેલ કંપનીઓએ પશ્ચિમ એશિયામાં ચાલી રહેલા સંકટ વચ્ચે આ પહેલા સપ્ટેમ્બરમાં એટીએફની કિંમતમાં 6.28 રૂપિયા પ્રતિ લિટર એટલે કે 5.46 ટકાનો વધારો કર્યો હતો. જ્યારે, ઓગસ્ટમાં પણ તેમાં પાંચ રૂપિયા પ્રતિ લિટરનો વધારો થયો હતો. ઓક્ટોબર મહિનામાં આ વધારો 13 ટકાનો છે, જ્યારે ત્રણ મહિનામાં જેટ ફ્યુઅલની કિંમતમાં 25 ટકાનો ઉછાળો આવી ચૂક્યો છે.

નોંધનીય છે કે, એરલાઇન્સના ઓપરેટિંગ માટે વિમાનન કંપનીઓના ખર્ચમાં એટીએફનો હિસ્સો 40 ટકા સુધી હોય છે, જેના કારણે ફ્યુઅલની કિંમતો એરલાઇન્સ માટે ખર્ચનું એક મહત્વપૂર્ણ પરિબળ બની જાય છે. આ કારણોસર, આવનારા સમયમાં હવાઈ મુસાફરી વધુ મોંઘી થઈ શકે છે.

હિન્દુસ્થાન સમાચાર / પ્રજેશ શંકર / મુકુંદ

હિન્દુસ્થાન સમાચાર / માધવી વ્યાસ