નવી દિલ્હી, 12 ઓક્ટોબર (હિ.સ.). ઉપરાષ્ટ્રપતિ સી.પી. રાધાકૃષ્ણને સોમવારે જણાવ્યું હતું કે, ભારત વિશ્વની અગ્રણી શક્તિ બનવા માંગે છે, જેથી કોઈ દેશ તેના પર અયોગ્ય શરતો લાદી ન શકે. તેમણે તમામ દેશોની સાર્વભૌમત્વનું સન્માન કરવા અને કોઈપણ દેશની સીમાઓનું અતિક્રમણ ન કરવાની જરૂરિયાત પર ભાર મૂક્યો.

રાષ્ટ્રીય સંરક્ષણ મહાવિદ્યાલય (એનડીસી)ના 66મા અભ્યાસક્રમના સહભાગીઓને સંબોધિત કરતા રાધાકૃષ્ણને કહ્યું કે, રાષ્ટ્રીય રણનીતિ એવી હોવી જોઈએ, જે દેશના ઉદ્દેશ્યોને નક્કર કાર્યવાહી અને પરિણામોમાં બદલી શકે. રાષ્ટ્રીય મૂલ્યો, હિતો અને ઉદ્દેશ્યો વચ્ચેનો સમન્વય દેશની સુરક્ષા અને વિકાસ માટે મહત્વપૂર્ણ છે.

ઉપરાષ્ટ્રપતિ એ કહ્યું કે, ભારતના રાષ્ટ્રીય હિતો તેના બંધારણીય મૂલ્યો- સાર્વભૌમત્વ, લોકશાહી, બિનસાંપ્રદાયિકતા, ન્યાય, સ્વતંત્રતા, સમાનતા, બંધુત્વ તથા રાષ્ટ્રની એકતા અને અખંડિતતા સાથે જોડાયેલા છે. તેમણે સાર્વભૌમત્વ અને પ્રાદેશિક અખંડિતતાની રક્ષા, લોકશાહી અને સંઘીય વ્યવસ્થા જાળવી રાખવા તથા દેશના વ્યૂહાત્મક, રાજકીય, આર્થિક અને સૈન્ય ઉદ્દેશ્યોને આગળ વધારવાને મુખ્ય પ્રાથમિકતાઓમાં સામેલ કર્યા.

રાધાકૃષ્ણને ભારતની સભ્યતાગત અવધારણા 'વસુધૈવ કુટુંબકમ્'નો ઉલ્લેખ કરતા કહ્યું કે, રાષ્ટ્રીય મૂલ્યો વિશ્વ સાથે દેશના સંબંધોને દિશા આપે છે. તેમણે કોવિડ-19 મહામારી દરમિયાન ભારતની 'વેક્સિન મૈત્રી' પહેલ, આપત્તિઓના સમયે સહાયતા અને જળવાયુ પરિવર્તનનો સામનો કરવાના આંતરરાષ્ટ્રીય પ્રયાસોમાં દેશની ભૂમિકાનો પણ ઉલ્લેખ કર્યો.

તેમણે કહ્યું કે, આતંકવાદ, સાયબર જોખમો, મહામારી, જળવાયુ પરિવર્તન અને સરહદ પારના અપરાધો જેવા પડકારોનો સામનો કરવા માટે આંતરરાષ્ટ્રીય સહયોગ આવશ્યક છે. રાષ્ટ્રીય હિતોની રક્ષા અને વહેંચાયેલા વૈશ્વિક હિતોને આગળ વધારવા એકબીજાના પૂરક હોઈ શકે છે. આ માટે દેશો વચ્ચે સમન્વય, સૂચનાઓનું આદાન-પ્રદાન અને પરસ્પર વિશ્વાસ જરૂરી છે.

ઉપરાષ્ટ્રપતિ એ વિકસિત ભારત-2047ને દેશનું મહત્વપૂર્ણ રાષ્ટ્રીય લક્ષ્ય જણાવતા કહ્યું કે, દીર્ઘકાલીન દૃષ્ટિકોણને ઉપલબ્ધ સંસાધનો અને રાષ્ટ્રીય પ્રાથમિકતાઓને અનુરૂપ બનાવવો પડશે. રાષ્ટ્રીય સુરક્ષામાં દેશની જમીની સીમાઓ, હવાઈ ક્ષેત્ર, દરિયાઈ હિતો અને સાયબર ક્ષેત્રની રક્ષાની સાથે-સાથે સતત વિકાસ અને સમૃદ્ધિ માટે અનુકૂળ પરિસ્થિતિઓ તૈયાર કરવી પણ સામેલ છે.

રાધાકૃષ્ણને વૈશ્વિક દક્ષિણના દેશો સાથે સહયોગ વધારવાની જરૂરિયાત પર ભાર મૂકતા કહ્યું કે, દરેક સાર્વભૌમ રાષ્ટ્ર સમાન છે, ભલે તે મોટો હોય કે નાનો. તેમણે ટેકનોલોજી, વેપાર, સંપર્ક, શિક્ષણ, નવીનતા અને ક્ષમતા નિર્માણના ક્ષેત્રોમાં સહયોગ વધારવાનું આહ્વાન કર્યું. તેમણે વૈશ્વિક દક્ષિણ સામે ભ્રષ્ટાચારને એક મોટી પડકાર જણાવતા તેના નિવારણ માટે સામૂહિક પ્રયાસો કરવાની જરૂરિયાત પણ જણાવી.

એનડીસીના 66મા અભ્યાસક્રમમાં ભારતીય સશસ્ત્ર દળો, સિવિલ સેવાઓ, પોલીસ અને અન્ય સરકારી સંગઠનોના અધિકારીઓ સાથે મિત્ર દેશોના 41 અધિકારીઓ સહિત કુલ 122 સહભાગીઓ સામેલ છે. આ અવસરે રાષ્ટ્રીય સંરક્ષણ મહાવિદ્યાલયના કમાન્ડન્ટ એર માર્શલ મનીષ કુમાર ગુપ્તા અને અન્ય અધિકારીઓ પણ હાજર હતા.

હિન્દુસ્થાન સમાચાર / સુશીલ કુમાર / પવન કુમાર

હિન્દુસ્થાન સમાચાર / માધવી વ્યાસ