શ્રીનગર, નવી દિલ્હી, 14 ઓક્ટોબર (હિ.સ.). સક્રિય પશ્ચિમી વિક્ષોભને કારણે બુધવારે સવારે કાશ્મીરના ઊંચા વિસ્તારોમાં થયેલી તાજી બરફવર્ષાથી ઘણા વિસ્તારો બરફની ચાદરથી ઢંકાઈ ગયા. મેદાની વિસ્તારોમાં રાતભર વરસાદ થયા બાદ હવામાન વિભાગે આગામી 24 કલાકમાં વરસાદની આગાહી કરી છે.

અધિકારીઓએ જણાવ્યું કે, સક્રિય પશ્ચિમી વિક્ષોભની અસરથી ઊંચા વિસ્તારોના ઘણા ક્ષેત્રોમાં રાતભર હળવાથી મધ્યમ બરફવર્ષા થઈ. કાશ્મીરના ઊંચા વિસ્તારોના ઘણા ક્ષેત્રોમાં તાજી બરફવર્ષા થઈ અને અન્ય ઘણા સ્થળોએ બીજા દિવસે પણ બરફવર્ષા ચાલુ રહી. દક્ષિણ કાશ્મીરના અનંતનાગ જિલ્લામાં પહેલગામ પર્યટન સ્થળ અને તેની આસપાસના વિસ્તારોમાં રાતભર બરફવર્ષા થઈ. ગુલમર્ગ અને સોનમર્ગના પર્યટન સ્થળોની સાથે સાથે ઉત્તર કાશ્મીરના ગુરેઝમાં ઝોઝિલા એક્સિસ, રાજદાન ટોપ અને તુલૈલમાં છૂટોછવાયો હિમવર્ષા ચાલુ રહી. શ્રીનગર સહિત ખીણના મેદાની વિસ્તારોમાં રાતભર વરસાદ થયો પરંતુ સવારે વાદળો વિખેરાઈ ગયા અને સૂર્યપ્રકાશ દેખાયો.

હવામાન વિભાગે જણાવ્યું કે, ગુરુવાર સુધી ઘણા સ્થળોએ હળવાથી મધ્યમ વરસાદ અને ઊંચા વિસ્તારોમાં હળવી બરફવર્ષાની સંભાવના છે. આ સાથે ગાજવીજ, તેજ પવનો અને છૂટાછવાયા સ્થળોએ કરા પણ પડી શકે છે. 16 ઓક્ટોબરના રોજ છૂટાછવાયા સ્થળોએ હળવા વરસાદ સાથે હવામાન સામાન્ય રીતે સૂકું રહેશે. આ પછી 24 ઓક્ટોબર સુધી હવામાન સામાન્ય રીતે સૂકું રહેશે.

હિન્દુસ્થાન સમાચાર / સુમન લતા / સુનીત નિગમ

હિન્દુસ્થાન સમાચાર / માધવી વ્યાસ