નવી દિલ્હી, 14 ઓક્ટોબર (હિ.સ.) વડાપ્રધાન નરેન્દ્ર મોદીએ કહ્યું કે, ભારતનું શાસન મોડેલ ફક્ત કલ્યાણકારી સહાયતા પૂરતું સીમિત નથી, પરંતુ નાગરિકોને સશક્ત બનાવીને વિકાસ પ્રક્રિયામાં ભાગીદાર બનાવવાનું માધ્યમ બની રહ્યું છે. તેમણે સ્વચ્છતા, રસોઈ ગેસ કનેક્શન, સ્વાસ્થ્ય સુરક્ષા અને સરળ લોન સુવિધા જેવી યોજનાઓને અંતિમ વ્યક્તિ સુધી લાભ પહોંચાડવા અને લોકો માટે નવી તકો ઊભી કરવાનું માધ્યમ ગણાવ્યું.

વડાપ્રધાન કાર્યાલય (પીએમઓ) એ બુધવારે સામાજિક મીડિયા પ્લેટફોર્મ એક્સ પર, કેન્દ્રીય સંચાર અને પૂર્વોત્તર ક્ષેત્ર વિકાસ મંત્રી જ્યોતિરાદિત્ય સિંધિયાના લેખને શેર કર્યો. પીએમઓએ કહ્યું કે, યોજનાઓની અંતિમ છેડા સુધી પહોંચ અને જનભાગીદારી શાસન વ્યવસ્થામાં વાસ્તવિક પરિવર્તન લાવી રહી છે. આ દ્રષ્ટિકોણ વર્ષ 2047 સુધીમાં વિકસિત ભારત નિર્માણના લક્ષ્યનો મહત્વપૂર્ણ આધાર છે.

જ્યોતિરાદિત્ય સિંધિયાએ એક અંગ્રેજી સમાચારપત્રમાં ‘મુવિંગ ગવર્નન્સ ફ્રોમ વેલફેર ટુ એમ્પાવરમેન્ટ’ (કલ્યાણથી સશક્તિકરણ તરફ શાસન) શીર્ષક હેઠળ લેખ લખ્યો છે. તેમાં તેમણે કહ્યું કે, મોદી સરકારમાં શાસન વ્યવસ્થામાં ગરિમા, તક અને જનભાગીદારીને કેન્દ્રમાં રાખવામાં આવી છે. આ લેખમાં મહાત્મા ગાંધીના સૌથી ગરીબ વ્યક્તિને અવાજ આપવાના વિચાર અને પંડિત દીનદયાળ ઉપાધ્યાયના અંત્યોદય દર્શનનો ઉલ્લેખ કરવામાં આવ્યો છે.

સિંધિયાએ લેખમાં કહ્યું કે, પ્રત્યક્ષ લાભ હસ્તાંતરણ (ડીબીટી) અને જનધન-મોબાઇલ ટેકનોલોજીના માધ્યમથી લગભગ 50 લાખ કરોડ રૂપિયા લાભાર્થીઓના બેંક ખાતાઓમાં મોકલવામાં આવ્યા છે. તેમાં દાવો કરવામાં આવ્યો કે, વર્ષ 2013-14ની સરખામણીમાં દેશની અર્થવ્યવસ્થા લગભગ ત્રણ ગણી વધીને 331 લાખ કરોડ રૂપિયાના સ્તરે પહોંચી ગઈ છે. દેશમાં 2.23 લાખથી વધુ સ્ટાર્ટઅપ્સે 23 લાખથી વધુ રોજગારીનું સર્જન કર્યું છે.

સિંધિયાએ લેખમાં ઉજ્જવલા યોજના હેઠળ 10.5 કરોડથી વધુ રસોઈ ગેસ કનેક્શન, સ્વચ્છ ભારત મિશન હેઠળ લગભગ 12 કરોડ ઘરેલું શૌચાલયોના નિર્માણ અને આયુષ્માન ભારત યોજના હેઠળ 12 કરોડ લોકોની સારવારનો ઉલ્લેખ કર્યો છે. મુદ્રા યોજના હેઠળ 59 કરોડથી વધુ ગેરંટી વિનાની લોન મંજૂર કરવામાં આવી છે, જ્યારે સ્વયં સહાય જૂથો સાથે જોડાયેલી ત્રણ કરોડથી વધુ ગ્રામીણ મહિલાઓ ‘લખપતિ દીદી’ બની છે. સિંધિયાએ આ પહેલોને નાગરિકોને આત્મનિર્ભર બનાવવા માટે ઉઠાવવામાં આવેલા પગલાં તરીકે રજૂ કરી છે.

હિન્દુસ્થાન સમાચાર/પ્રશાંત શેખર/પવન કુમાર

હિન્દુસ્થાન સમાચાર / ડો.હિતેશ એન.વ્યાસ