નવી દિલ્હી, 14 ઓક્ટોબર (હિ.સ.). કેન્દ્રીય મંત્રીમંડળે રેલવેના 11.40 લાખ બિન-રાજપત્રિત કર્મચારીઓ માટે 78 દિવસના ઉત્પાદકતા આધારિત બોનસને મંજૂરી આપી છે. આના પર આશરે 2,009.61 કરોડ રૂપિયા ખર્ચ થશે. પ્રધાનમંત્રી નરેન્દ્ર મોદીની અધ્યક્ષતામાં બુધવારે યોજાયેલી મંત્રીમંડળની બેઠકમાં આ નિર્ણય લેવામાં આવ્યો.

માહિતી અને પ્રસારણ મંત્રી અશ્વિની વૈષ્ણવે મીડિયાને કેબિનેટના નિર્ણયો વિશે માહિતી આપી. તેમણે જણાવ્યું કે, રેલવે કર્મચારીઓ માટે 78 દિવસના બોનસને મંજૂરી આપવામાં આવી છે. આનાથી આશરે 11.40 લાખ કર્મચારીઓને લાભ થશે. તેમણે કહ્યું, “આ મહેનતુ રેલવે કર્મચારીઓ માટે દિવાળીની ભેટ છે, જેઓ દિવસ-રાત કામ કરે છે. જ્યારે આપણે તહેવારો ઉજવીએ છીએ, ત્યારે તેઓ મેદાનમાં, પાટા પર, રેલ એન્જિનોની અંદર અને વર્કશોપમાં દિવસ-રાત કામ કરે છે. આવા તમામ રેલવે કર્મચારીઓ માટે આ દિવાળીની ભેટ આશરે 2,009 કરોડ રૂપિયાનું બોનસ છે.”

વૈષ્ણવે કહ્યું કે, વર્ષ 2014 થી અત્યાર સુધીમાં રેલવેમાં આશરે 5.5 લાખ લોકોની ભરતી કરવામાં આવી છે. તેમણે જણાવ્યું કે રેલવેમાં 1.65 લાખ ખાલી જગ્યાઓ માટે ભરતી પ્રક્રિયા શરૂ કરવામાં આવી છે અને પરીક્ષાઓ ચાલી રહી છે. તાજેતરમાં આશરે 37 હજાર લોકોને કાયમી રોજગાર આપવામાં આવ્યો છે. મંત્રીએ કહ્યું, “વ્યવહારિક રીતે રેલવેના કુલ 12 લાખ કર્મચારીઓમાંથી આશરે અડધાની ભરતી રાષ્ટ્રીય જનતાંત્રિક ગઠબંધન (રાજગ) સરકારના કાર્યકાળમાં થઈ છે.”

રેલવે કર્મચારીઓને દર વર્ષે દુર્ગા પૂજા અને દશેરાની આસપાસ ઉત્પાદકતા આધારિત બોનસ આપવામાં આવે છે. આ વખતે પાત્ર કર્મચારીઓને 78 દિવસના પગાર બરાબર બોનસ મળશે. પ્રત્યેક પાત્ર કર્મચારી માટે બોનસની મહત્તમ રકમ 17,951 રૂપિયા નક્કી કરવામાં આવી છે. આ બોનસથી ટ્રેક જાળવણી કરનાર, રેલ ચાલક, ટ્રેન પ્રબંધક (રક્ષક), સ્ટેશન પ્રમુખ, નિરીક્ષક, તંત્રજ્ઞ, તંત્રજ્ઞ સહાયક, પોઇન્ટ્સ સંચાલક, મંત્રાલયના કર્મચારીઓ અને અન્ય ગ્રુપ ‘સી’ કર્મચારીઓને લાભ થશે.

રેલવેએ નાણાકીય વર્ષ 2025-26માં 167 કરોડ ટન માલની હેરફેર કરી, જે અત્યાર સુધીનો રેકોર્ડ છે. આ સમયગાળા દરમિયાન રેલવે દ્વારા આશરે 741 કરોડ મુસાફરોએ મુસાફરી કરી. સરકારના મતે, કર્મચારીઓના યોગદાને રેલવેના સંચાલન અને માલસામાન તેમજ મુસાફરોના પરિવહનના પ્રદર્શનમાં મહત્વપૂર્ણ ભૂમિકા ભજવી છે.

હિન્દુસ્થાન સમાચાર / સુશીલ કુમાર / પવન કુમાર

હિન્દુસ્થાન સમાચાર / માધવી વ્યાસ