નવી દિલ્હી, 14 ઓક્ટોબર (હિ.સ.) ઉત્તર પ્રદેશના ઉચ્ચ શિક્ષણ રાજ્ય મંત્રી રજની તિવારીએ જણાવ્યું હતું કે, રાજ્ય સરકાર ઉચ્ચ શિક્ષણને વધુ પારદર્શક, ટેકનોલોજી આધારિત અને રોજગારલક્ષી બનાવવા માટે સતત કામ કરી રહી છે. તેમણે કહ્યું હતું કે, રાજ્યમાં નકલ માફિયાઓ પર અસરકારક રીતે અંકુશ મૂકવામાં આવ્યો છે, રાષ્ટ્રીય શિક્ષણ નીતિ-2020ને અનુરૂપ યુનિવર્સિટીઓ અને કોલેજોમાં ફેરફારો કરવામાં આવી રહ્યા છે અને પ્રતિભાશાળી વિદ્યાર્થીઓને મફત સ્કૂટી પૂરી પાડવા માટે ઝડપી ગતિએ કામ ચાલી રહ્યું છે.

ઉત્તર પ્રદેશના ઉચ્ચ શિક્ષણ રાજ્ય મંત્રી અને હરદોઈની શાહાબાદ બેઠકના ધારાસભ્ય રજની તિવારીએ હિન્દુસ્તાન સમાચારને આપેલા એક ઇન્ટરવ્યુમાં ઉચ્ચ શિક્ષણમાં સુધારા, વિદ્યાર્થીનીઓના શિક્ષણ, ખાલી જગ્યાઓ પર નિમણૂકો, વિપક્ષનું રાજકારણ અને શાહાબાદના વિકાસ કાર્યો પર વિસ્તૃત વાત કરી હતી. તેમણે દાવો કર્યો હતો કે, જ્યાં યુનિવર્સિટીઓ ન હતી તેવા મંડળોમાં યુનિવર્સિટીઓની સ્થાપના કરવામાં આવી છે જેથી વિદ્યાર્થીનીઓએ ઉચ્ચ શિક્ષણ માટે દૂર ન જવું પડે.

ઉચ્ચ શિક્ષણ સંસ્થાઓમાં ખાલી જગ્યાઓ પર નિમણૂંકોના પ્રશ્ન પર તેમણે કહ્યું કે, સરકારે પારદર્શક પ્રક્રિયા હેઠળ મોટા પાયે નિમણૂકો કરી છે. બાકીની જગ્યાઓ ભરવાની પ્રક્રિયા પણ ચાલી રહી છે. રાષ્ટ્રીય શિક્ષણ નીતિ-2020નો ઉદ્દેશ શિક્ષણને ભારતીય સંસ્કૃતિ અને આધુનિક ટેકનોલોજી સાથે જોડવાનો અને યુવાનો માટે રોજગારીની તકો વધારવાનો છે.

તેમણે ઉમેર્યું હતું કે, કોલેજોમાં ડિજિટલ લાઈબ્રેરીઓ અને ડિજિટલ પાર્ક સ્થાપવામાં આવ્યા છે. ગ્રામીણ કોલેજોને આધુનિક સંસાધનોથી સજ્જ કરવા માટે બજેટ વધારવામાં આવી રહ્યું છે. સરકારનું લક્ષ્ય દરેક વિદ્યાર્થી માટે આધુનિક ટેકનોલોજી સુલભ બનાવવાનું છે. રાજ્યમાં અગાઉની સરકારોમાં નકલને રાજકીય પ્રોત્સાહન મળતું હતું, પરંતુ પ્રધાનમંત્રી નરેન્દ્ર મોદી અને મુખ્યમંત્રી યોગી આદિત્યનાથના નેતૃત્વમાં વ્યવસ્થા બદલાઈ ગઈ છે. તેમણે દાવો કર્યો હતો કે રાજ્યમાં ઉચ્ચ શિક્ષણની પરીક્ષાઓ હવે પારદર્શક અને નકલ મુક્ત રીતે હાથ ધરવામાં આવી રહી છે. આનાથી યુવાનોમાં આત્મવિશ્વાસ વધ્યો છે અને તેઓ વૈશ્વિક સ્પર્ધા માટે તૈયાર થઈ રહ્યા છે.

તેમણે કહ્યું કે, કાયદો અને વ્યવસ્થામાં સુધારા અને સરકારી યોજનાઓએ છોકરીઓના શાળા છોડવાના દરમાં ઘટાડો કર્યો છે. વિદ્યાર્થીઓને ટેબ્લેટ અને સ્માર્ટફોન આપવામાં આવ્યા છે. પ્રતિભાશાળી વિદ્યાર્થિનીઓને સ્કૂટી પ્રદાન કરવાની યોજના પણ તૈયાર કરવામાં આવી રહી છે. તેમણે કહ્યું હતું કે, મહિલા ડિગ્રી કોલેજો અને સરકારી કોલેજો ખોલવાથી વિદ્યાર્થીનીઓ માટે ઉચ્ચ શિક્ષણની તકોમાં વધારો થયો છે. રાજ્યમાં ઉચ્ચ શિક્ષણ વિભાગ શાળા છોડી દેવાના કારણો પર નજર રાખી રહ્યો છે. જો કોઈ વિદ્યાર્થી 12મા પછી ઉચ્ચ શિક્ષણમાં પ્રવેશ ન લે અથવા પ્રથમ વર્ષ પછી અભ્યાસ છોડી દે, તો તેના કારણોનો અભ્યાસ કરવામાં આવી રહ્યો છે અને ઉકેલો શોધવામાં આવી રહ્યા છે.

મહિલા અનામતના મુદ્દે તેમણે વિપક્ષ પર નિશાન સાધ્યું હતું. તેમણે કહ્યું કે, સંસદમાં નારી શક્તિ વંદના અધિનિયમ પર ચર્ચા દરમિયાન વિપક્ષના બેવડા ધોરણો, સામે આવ્યા હતા. મહિલાઓ હવે વિપક્ષની રાજનીતિ અને તેના વાસ્તવિક વલણને સમજી રહી છે. સમાજવાદી પાર્ટીની પીડીએ ફોર્મ્યુલા પર તેમણે કહ્યું કે, વિપક્ષ પાસે સ્પષ્ટ વિચારધારા, નીતિ અને દ્રષ્ટિકોણ નથી. તેમણે દાવો કર્યો હતો કે, ભારતીય જનતા પાર્ટી ભેદભાવ વિના તમામ વર્ગો માટે કામ કરી રહી છે અને જનતા હવે નારાની રાજનીતિથી આગળ વધી ગઈ છે.

હિન્દુસ્થાન સમાચાર/પ્રશાંત શેખર/ પવન કુમાર

હિન્દુસ્થાન સમાચાર / માધવી વ્યાસ