જયપુર, નવી દિલ્હી, 14 ઓક્ટોબર (હિ.સ.) ફ્રેન્કફર્ટથી દિલ્હી જઈ રહેલા એર ઇન્ડિયાના વિમાનનું બુધવારે સવારે બોમ્બની ધમકી મળ્યા બાદ અને હાઇજેક એલર્ટ સંબંધિત સંકેતની સૂચના મળ્યા પછી જયપુર આંતરરાષ્ટ્રીય હવાઈમથક પર આકસ્મિક ઉતરાણ કરાવવામાં આવ્યું. વિમાનમાં સવાર તમામ 250 મુસાફરો સુરક્ષિત હોવાની જાણકારી છે. સુરક્ષા એજન્સીઓએ વિમાન અને મુસાફરોના સામાનની તપાસ શરૂ કરી દીધી છે.

બોઇંગ 787-9 ડ્રીમલાઇનર વિમાને 13 ઓક્ટોબરની રાત્રે લગભગ 9:45 વાગ્યે ફ્રેન્કફર્ટથી ઉડાન ભરી હતી. વિમાનને બુધવારે સવારે 10:40 વાગ્યે દિલ્હી પહોંચવાનું હતું. ઉડાન દરમિયાન ભારતીય હવાઈ ક્ષેત્ર નજીક બોમ્બની ધમકી મળ્યાની સૂચના સામે આવી. આ દરમિયાન સવારે લગભગ 9 વાગ્યે અમદાવાદ એર ટ્રાફિક કંટ્રોલ (એટીસી)ને થોડી સેકન્ડ માટે સ્ક્વોક-7500 કોડનો સંકેત મળ્યો. વિમાનન ક્ષેત્રમાં આ કોડનો ઉપયોગ હાઇજેકની સ્થિતિમાં કરવામાં આવે છે. જોકે, સંકેત મળવાનું વાસ્તવિક કારણ સત્તાવાર રીતે પુષ્ટિ થયું નથી.

ત્યારબાદ સુરક્ષા સંબંધિત સૂચના જયપુર એટીસી સાથે શેર કરવામાં આવી. સવારે લગભગ 9:10 વાગ્યે વિમાનનો માર્ગ બદલીને જયપુર તરફ વાળવામાં આવ્યો. વિમાને લગભગ 9:45 વાગ્યે જયપુર હવાઈમથક પર સુરક્ષિત ઉતરાણ કર્યું. સુરક્ષા એજન્સીઓની દેખરેખ હેઠળ મુસાફરોને વિમાનમાંથી ઉતારીને ટર્મિનલમાં બેસાડવામાં આવ્યા. વિમાન અને મુસાફરોના સામાનની તપાસ કરવામાં આવી રહી છે. હાલમાં કોઈ શંકાસ્પદ વસ્તુ મળ્યાની કે તપાસના અંતિમ પરિણામની સત્તાવાર પુષ્ટિ થઈ નથી.

સૂત્રો અનુસાર ગૃહ મંત્રાલયે આ મામલાને ગંભીરતાથી લીધો છે અને દિલ્હીમાં રાષ્ટ્રીય સુરક્ષા ગાર્ડ (એનએસજી)ની કમાન્ડો ટીમને તૈયાર રહેવાના નિર્દેશ આપવામાં આવ્યા છે. ટીમના જયપુર પહોંચવાની સંભાવના પણ વ્યક્ત કરવામાં આવી છે. બોમ્બની ધમકી અને હાઇજેક એલર્ટ સંબંધિત સંકેત અંગે તપાસ ચાલુ છે.

હિન્દુસ્થાન સમાચાર / દિનેશ / ઈશ્વર / સુનીત નિગમ

હિન્દુસ્થાન સમાચાર / ડો.હિતેશ એન.વ્યાસ