મુંબઈ, નવી દિલ્હી, 02 ઓક્ટોબર (હિ.સ.). અભિનેત્રી નુસરત ભરૂચાને લઈને એક ચિંતાજનક સમાચાર સામે આવ્યા છે. બાલીમાં શૂટિંગ દરમિયાન થયેલા અકસ્માતમાં તેમની કરોડરજ્જુમાં ફ્રેક્ચર થયું છે. હાલમાં અભિનેત્રી બાલીની એક હોસ્પિટલમાં ડોકટરોની દેખરેખ હેઠળ છે. તેમની ટીમના સત્તાવાર નિવેદન મુજબ, ડોકટરોની તપાસ બાદ નુસરતની કરોડરજ્જુની સર્જરી કરવામાં આવશે. આ માટે તેમને એર એમ્બ્યુલન્સ દ્વારા બાલીથી મુંબઈ લાવવાની તૈયારીઓ કરવામાં આવી રહી છે.

નુસરતની ટીમે જણાવ્યું કે, આ સમયે અભિનેત્રીનું સ્વાસ્થ્ય ટીમની પ્રાથમિકતા છે અને તેમને જરૂરી તબીબી સુવિધા ઉપલબ્ધ કરાવવા પર સંપૂર્ણ ધ્યાન આપવામાં આવી રહ્યું છે. ટીમે નુસરતના પ્રશંસકો અને શુભચિંતકોની ચિંતા તથા શુભેચ્છાઓ માટે આભાર વ્યક્ત કર્યો છે. સાથે જ, સૌને અભિનેત્રીની ગોપનીયતાનું સન્માન કરવા અને તેમને સારવાર તથા સ્વાસ્થ્ય લાભ પર ધ્યાન કેન્દ્રિત કરવા અપીલ કરવામાં આવી છે. યોગ્ય સમયે નુસરતની સ્વાસ્થ્ય સ્થિતિ સંબંધિત આગળની માહિતી શેર કરવામાં આવશે.

જણાવવામાં આવી રહ્યું છે કે, ઈજાની ગંભીરતા અને પ્રસ્તાવિત સર્જરીને કારણે નુસરતને સંપૂર્ણ સ્વસ્થ થવા માટે થોડો સમય આરામ કરવો પડી શકે છે. આવા સંજોગોમાં, આવનારા કેટલાક અઠવાડિયા તેમના કામ પર અસર કરી શકે છે. નુસરત શૂટિંગના કામ માટે બાલી ગઈ હતી, જ્યાં સેટ પર અકસ્માત થયો હતો. હાલમાં તેમની સારવાર ચાલુ છે અને તેમને આગળની સારવાર માટે મુંબઈ લાવવાની તૈયારીઓ કરવામાં આવી રહી છે.

હિન્દુસ્થાન સમાચાર / લોકેશ ચંદ્ર દુબે / રામાનુજ શર્મા

હિન્દુસ્થાન સમાચાર / માધવી વ્યાસ